Ўзбекистоннинг яна 940 га яқин фуқароси Ростов-Дондан поездда Тошкентга келтирилади. Яқин орада яна 3 мингга яқин ўзбекистонликни ватанга жўнатиш режалаштирилган. Бу ҳақда Ўзбекистоннинг Ростов-Дондаги бош консуллиги бош консули Рустам Курганбаевга таяниб, «Kun.uz» хабар берди.
«7 сентябрда поезд келади. Бу юртдошларни олиб чиқиш учун келган учинчи поезддир. 8 сентябрда у соат 13:00 да Тошкентга жўнайди. 940 га яқин юртдошларни жўнатишни режалаштирганмиз», — дея маълум қилган Курганбаев.
Унинг таъкидлашича, Ўзбекистонга қайтаётганлар Жанубий ва Шимолий Кавказ федерал округларига мавсумий қишлоқ хўжалиги ишларига келган меҳнат мигрантларидир. Аввалги йилларда ўзбекистонликлар мавсумий ишлар якунлангач, Россияни автобус ёки машиналарда тарк этишган, бироқ пандемия ортида киритилган чекловлар туфайли жорий йилда бунинг иложи бўлмаган.
«Юртдошларни келишувга эришилиши ва рухсат олинишига қараб жўнатишни режалаштирмоқдамиз. Ватанга қайтишни истовчилар кўп. Ҳозирда рўйхатда қайтишни кутаётган 3 минг киши бор», — деб таъкидлаб ўтган бош консул. Унинг айтишича, Ўзбекистонга 6 та авиарейс ва 2 та поезд жўнатилган.
«Биз бу жараённи Ростов раҳбарияти, ички ишлар вазирлиги, транспорт полицияси, Шимолий Кавказ темир йўли билан ташкиллаштирмоқдамиз. Барчаси келишилган. Ҳаммаси назоратимиз остида», — дея қўшимча қилган Курганбаев.
Аввал ҳам Республика махсус комиссияси қарорига асосан Россиянинг Шимолий Кавказ ва Жанубий федерал округларидаги ўзбекистонликларни олиб келиш учун Тошкент—Ростов-Дон—Тошкент йўналиши бўйича темир йўл рейси ташкил қилинган. 10 август куни Гниловская—Тошкент йўналишида ҳаракатланишни бошлаган поезд 13 август куни 918 нафар фуқарони Ўзбекистонга олиб келган.
Изоҳ (0)