Toshkentdagi Yangi hayot kichik tumani hokimligiga Hayot Inog‘omov nomzodi taklif qilindi

O‘zbekiston Prezidenti Choshtepa va Qipchoq mavzelari negizida Toshkent shahar hokimligiga to‘g‘ridan to‘g‘ri bo‘ysunadigan alohida Yangi hayot kichik tumanini tashkil etish tashabbusini ilgari surdi. Shavkat Mirziyoyev ushbu tumanga Hayot Inog‘omovni hokim etib tayinlashni taklif qildi. Bu haqda “Axborot 24” dasturida ma’lum qilindi.

Hayot Inog‘omov (1986-yilda tug‘ilgan) 2008-yili Toshkent avtomobil yo‘llarini loyihalash, qurish va ekspluatatsiyasi institutini tamomlagan. 2007—2009-yillarda “Maxsustrans” bosh mutaxassisi sifatida ishlagan, 2009—2011-yilda esa Technologie De L’avenir kompaniyasi bo‘lim boshlig‘i, 2012—2017-yillarda — kompaniya direktori lavozimlarida faoliyat ko‘rsatgan.

2011—2012-yillarda Atlant Metal, 2017—2018-yillar esa Pallada Investment qo‘shma korxonasiga rahbarlik qilgan.

2018-yili Vazirlar Mahkamasi huzuridagi Tashkent City xalqaro ishbilarmonlik markazi rahbarining birinchi o‘rinbosari lavozimida ishlagan. Shuningdek, 2018-yildan poytaxt hokimi o‘rinbosari — Toshkent shahar kanallardan foydalanish va ularga tutash hududlarni obodonlashtirish boshqarmasi boshlig‘i lavozimida ishlab kelayotgandi.

Eslatib o‘tamiz, Shavkat Mirziyoyev 29-may kuni Sergeli tumaniga borib, joylarda amalga oshirilayotgan ishlab bilan tanishgan edi.