«Республика озиқ-овқат саноатини жадал ривожлантириш ҳамда аҳолини сифатли озиқ-овқат маҳсулотлари билан тўлақонли таъминлашга доир чора-тадбирлар тўғрисида»ги Президент қарори қабул қилинди. Бу ҳақда «Халқ сўзи Online» хабар берган.
Қарор билан «Ўзбекозиқовқатхолдинг» ХК тугатилмоқда. «Ўзбекозиқовқатхолдинг» ХКни тугатиш комиссияси тузилган.
Озиқ-овқат саноатини ривожлантириш мақсадида Қишлоқ хўжалиги вазирлигининг Қишлоқ хўжалигини ривожлантириш ва озиқ-овқат таъминоти жамғармаси маблағлари ҳисобидан:
- озиқ-овқат маҳсулотларини ишлаб чиқариш бўйича илк маротаба ташкил этилаётган истиқболли лойиҳаларнинг техник-иқтисодий асосланишини тайёрлаш билан боғлиқ харажатларнинг 50 фоизини, лекин ҳар бир лойиҳа учун 100 миллион сўмдан кўп бўлмаган миқдорда қоплаш;
- озиқ-овқат маҳсулотларини ишлаб чиқариш бўйича илк маротаба ташкил этилаётган истиқболли лойиҳаларнинг инфратузилмасини таъминлаш билан боғлиқ харажатларнинг 50 фоизини, лекин ҳар бир лойиҳа учун 100 миллион сўмдан кўп бўлмаган миқдорда қоплаш;
- озиқ-овқат маҳсулотларини етиштириш ва уларни чуқур қайта ишлаш соҳасига хорижий экспертларни жалб қилиш билан боғлиқ харажатларнинг 50 фоизини, лекин ҳар бир лойиҳа учун 50 миллион сўмдан кўп бўлмаган миқдорда қоплаш белгиланди.
Кадрларга бўлган эҳтиёжлар асосида 2021/22-ўқув йилидан бошлаб, республика ОТМларининг «Озиқ-овқат технологияси» ҳамда «Қишлоқ хўжалиги маҳсулотларини сақлаш ва дастлабки ишлаш технологияси» каби таълим йўналишлари бўйича бакалавриатнинг кундузги ва сиртқи таълим шаклларига ўқишга қабул қилишнинг давлат буюртмаси параметрлари босқичма-босқич ошириб борилади.
Аввал Президент фармони ва қарорига мувофиқ, Ўзбекистонда кадастр органлари Давлат солиқ қўмитаси тизимига ўтказилган ва «Ермулккадастр» давлат корхонаси негизида Давлат кадастрлари палатаси ташкил этилиши белгиланганди.
2020 йилинг июль ойида «Республика озиқ-овқат саноатини бошқариш тизимини такомиллаштиришга оид қўшимча чора-тадбирлар тўғрисида»ги қарори лойиҳаси жамоатчилик муҳокамасига қўйилган ва унда «Ўзбекозиқовқатхолдинг»нинг тугатилиши, компания таркибига кирувчи корхона ва ташкилотларнинг устав жамғармаларидаги давлат акция (улуш)лари баланс қиймати бўйича бепул Давлат активларини бошқариш агентлигига ўтказилиши белгиланганди.
Бундан аввал 2019 йил 30 январь куни ҳам «Ўзбекозиқовқатхолдинг» компанияси тугатилиши ҳақида хабар берилган. Компания ўрнига ушбу соҳада ўзини ўзи тартибга солувчи ташкилот тузиш бўйича таклифлар киритилиши кўзда тутилганди. «Ўзбекозиқовқатхолдинг» 2016 йилда ташкил этилган.
Изоҳ (0)