Наманган вилояти Наманган шаҳар таркибида Давлатобод тумани қайтадан ташкил этилади. Бу ҳақда Олий Мажлис Қонунчилик палатаси депутатларининг 8 сентябрда бўлиб ўтган навбатдаги йиғилишида маълум қилинди.
Унга кўра, Давлатобод тумани таркибига Наманган шаҳрининг «Юксалиш», «Наврўз», «Нуробод», «Гулшан», «Орзу», «Порлоқ», «Навбаҳор», «Мустақиллик», «Тўқувчи», «Умид», «Янги тонг», «Халқлар дўстлиги», «Давлатобод», «Қуйи Ғирвон», «Юқори Ғирвон», «Ўрта Ғирвон», «Боғ», «Элобод», «Гулобод», «Ирвадон», «Шишакил, «Қуйи Ровустонл, «Ўрта Ровустон», «Юқори Ровустон» ва «Елхон» маҳаллалари ҳудудлари ўтказилиши назарда тутилмоқда.
Депутатларнинг таъкидлашича, бу ўзгаришлар ҳудудда янги инфратузилма объектлари барпо этилиши ҳамда аҳолига хизмат кўрсатиш тизимининг янада яхшилинишга хизмат қилади.
Эслатиб ўтамиз, Президент Шавкат Мирзиёев Наманганга ташрифи давомида Наманган шаҳри таркибида Давлатобод туманини қайта ташкил этиш таклифини берганди.
«Наманган шаҳрида бугунги кунда расман 630 минг киши истиқомат қилмоқда. Амалда 800 мингдан кўп. Миллиончи шаҳар бўлиш яхши, мана, Самарқанд ҳам бунга интиляпти. Лекин аҳоли сони кўпайган сари шунга яраша ҳал этилиши зарур бўлган масалалар кўлами ҳам ортиб боради. Шу боис Наманган шаҳрида Давлатобод туманини қайта ташкил этиш таклиф қилинмоқда», — деган эди Президент.
Маълумот учун, Давлатобод тумани Наманган шаҳри таркибида 1995 йилда собиқ Совет тумани негизида қайта ташкил этилган бўлиб, Олий Мажлис Сенатининг 2003 йил 12 декабрдаги қарорига асосан тугатилганди.
Изоҳ (0)