Олий Мажлиси Сенати раиси Танзила Норбоева Сардоба фожиаси юзага келишига сабабчи бўлганлар жазоланишини маълум қилди. Бу ҳақда у 5 сентябрь куни Олий Мажлис Сенати Кенгашининг Сирдарё вилоятида бўлиб ўтган сайёр мажлисида билдирган.
Фото: Сенат
«Сардоба сув омборида юзага келган ҳолат сабаблари, керак бўлса, сабабчилари ҳам аниқланади, бунга ҳеч қандай шубҳа бўлмаслиги керак. Ижтимоий тармоқларда берилаётган турли гап-сўзларга ўрин йўқ, албатта, чора кўрилади», — деган Сенат раиси.
Танзила Норбоева ушбу техноген ҳодиса оқибатларини бартараф этиш бўйича барча ишлар Сенат томонидан ўрганиб чиқилганини таъкидлади.
«Ишчи гуруҳ саъй-ҳаракатлари билан ҳудуддаги ижтимоий объектларни таъмирлаш ишлари учун қурилиш ташкилотларга тўланмай келинган 9,5 миллиард сўм тўлиқ ундириб берилди», — деган Норбоева.
Шунингдек, бу воқеа ўзбек халқини янада жипслашишига сабаб бўлганига урғу берди. «Сардобага ёрдам» акцияси халқимизни янада жипслаштирди, десам муболаға бўлмайди. Ўшанда ҳеч кимдан топшириқ бўлгани йўқ. Лекин барча вилоятлар, ҳудудларимиз ўзлари уюшиб Сирдарёга ёрдамларини келтиришди. Бу ҳам бўлса халқимизга хос бўлган бағрикенгликдан нишона, бир-биримизга кўмак бериш — сўзлар билан ифодалаб бўлмайдиган характеримизнинг намойиши», — деди у.
Сенат раисининг қайд этишича, Сирдарёдаги техноген фалокатдан жабр кўрган ҳудудларда бунёдкорлик ва қайта қуриш ишларини амалга ошириш учун давлатнинг бор ресурслар сафарбар қилинган.
«Куни кеча бош вазирнинг ўзи бир қатор вазирлар билан биргаликда келиб кетибди, бу ерда қилинаётган ишларни ўз кўзи билан кўриб, яна қўшимча топшириқларни берибди.
Айтмоқчимизки, Сирдарёда жуда катта ислоҳотлар ўтказилаётган эди, бу ишлар охиригача етмагунча, сирдарёликлар эски изига тушиб олмагунча ҳамма ишлар изчил амалга оширилади. Бу ишларнинг барчаси давлатимиз раҳбарининг шахсий назоратида турибди», — деди Танзила Норбоева.
