Халқ таълими вазирлиги масофадан ўқитиладиган болаларнинг ота-оналарига бир неча тавсиялар билан чиқди.
Вазирликнинг қайд этишича, ота-оналар аввало ўзлари ва болалари учун одатий кун тартибини белгилаб, унга риоя қилишлари лозим (ухлаш ва уйғониш вақти, дарсларнинг бошланиш вақти, уларнинг давомийлиги, танаффуслар ва бошқалар).
Кундалик ҳаётнинг кескин ўзгариши боланинг мослашиш имкониятларида сезиларли ўзгаришларни келтириб чиқариши ҳамда кераксиз стресс ва зўриқишларга олиб келиши мумкин. Ота-оналар ва боланинг оила аъзолари содир бўлаётган воқеаларга хотиржам, адекват муносабатни сақлашга ҳаракат қилишлари муҳимдир.
Боланинг ҳиссий ҳолати тўғридан-тўғри катталар (ота-оналар, қариндошлар) ҳолатига боғлиқ. Бошқа мамлакатлардаги ота-оналарнинг тажрибаси шуни кўрсатадики, ўзини изоляция қилиш режимига мослашиш учун бироз вақт керак бўлади ва бу нормал жараён ҳисобланади.
«Ўзингизни хотиржам тутинг, вазмин бўлинг. Болаларнинг вирусга оид саволларига жавоб беришдан қочманг ва ҳоказо, аммо пандемия ҳолати ва унинг хавф-хатарлари ҳақида узоқ мунозараларга шўнғиманг.
Болалар учун масофавий таълимни ташкил этиш бўйича мактабдан олган тавсияларингизни яхши тушуниб олишга ҳаракат қилинг. Сиз фақат синф ўқитувчиси ва мактаб маъмуриятидан олган расмий маълумотларга амал қилинг.
Ушбу жараённи ташкил этишда мактаб маъмурияти учун ҳам вақт талаб этилади, шунинг учун сизнинг бу вазиятни тушунган ҳолда муносабат билдиришингиз бебаҳо ёрдам бўлиши мумкин, бу эса таълим сифатига ижобий таъсир қилади.
Вазиятни тушунганингиз ва қўллаб-қувватлаганингиз учун олдиндан раҳмат», — дейилди вазирлик хабарида.
Эслатиб ўтамиз, Ўзбекистон мактабларида янги ўқув йили 14 сентябрдан бошланади. Ўқувчилар мактабга бориши ёки онлайн ўқиши мумкин. Санитария талабларига жавоб бермайдиган мактаблар ўқишни масофавий тарзда олиб боради. Давлат мактабларида янги ўқув йилида мажбурий мактаб формаси талаб қилинмайди. Шунингдек, дарслар таклиф этилганидек 30 дақиқа эмас, балки анъанавий 45 дақиқа ўтиладиган бўлди.
Аввалроқ ХТВ мактабларда таълим икки хил шаклда бўлишини инобатга олиб, ўқувчиларнинг ота-оналарига мурожаат билан чиққани, шунингдек, ўқув йили бошида айрим фанларни вақтинчалик ўтмасликни тавсия қилгани ҳақида хабар берилган эди.
Изоҳ (0)