Фарғона вилояти Қува туманида олти киши 18 ёшли йигитга тегишли бўлган икки қоп бодом ва Samsung Galaxy А20 телефонини тортиб олиб, талончилик содир этди. Бу ҳақда Тергов департаменти хабар берди.
Маълум қилинишича, 2020 йилнинг 27 август куни соат 03:40 да Қува тумани Ўзбекистон кўчасига Matiz автомашинасида келган номаълум шахслар 18 ёшли Х.Т.нинг жағ соҳасига мушт тушириб, унга тегишли жами нархи икки миллион сўм бўлган икки қоп бодом ва Samsung Galaxy А20 телефон аппаратини тортиб олган ва ҳодиса жойидан яширинган.
Мазкур ҳолат юзасидан Қува тумани ИИБ ҳузуридаги Тергов бўлими томонидан номаълум шахсларга нисбатан Жиноят кодексининг 166-моддаси 2-қисми «а» банди (ҳаёт ва соғлиқ учун хавфли бўлмаган зўрлик ишлатиб ёхуд шундай зўрлик ишлатиш билан қўрқитиб содир этилган талончилик) билан жиноят иши қўзғатилган.
Олиб борилган тезкор қидирув ҳаракатлари натижасида мазкур жиноятни 24 ёшли И.М., Ф.Ғ., Д.М., 25 ёшли Н.У., 26 ёшли М.К., 22 ёшли Т.Қ. содир этганлиги аниқланган. Matiz машинасини И.М. бошқарганлиги аниқланиб, Х.Т.га тегишли Samsung Galaxy А20 телефон аппарати ашёвий далил тариқасида расмийлаштириб олинган.
Бундан ташқари, И.М. ва унинг шериклари Фарғона вилоятининг бошқа туманларида шу каби жиноятлар содир этганлиги аниқланган ва уларнинг барчаси ушланган, ҳозирда тергов ҳаракатлари давом этмоқда.
Қува тумани ИИБ ҳузуридаги Тергов бўлими томонидан И.М. шу туманда жиноят содир этиб ушланганлиги сабабли, айбланувчи тариқасида жалб қилиниб, қамоққа олиш тарзидаги эҳтиёт чораси қўлланилган.
Мавзуга доир:
- Яккасаройда хитойлик аёлнинг 5000 АҚШ доллари, 2 миллион сўм пулини талон-тарож қилган шахслар қўлга олинди
- Тошкентда йўловчининг iPhone Х ва Аirpods’ини олиб қўйиб, ўзини кўчада қолдирган ҳайдовчи ҳамда унинг шериги қўлга тушди
- Жиззахда Gentra ойнасини синдириб, юкхонасидан 50 млн сўм ўғирлаган жиноий гуруҳ ушланди
Изоҳ (0)