Ўзбекистон Мудофаа вазирлигига ҳарбий хизматчилари Халқаро армия ўйинлари доирасида «Фориш» тоғ полигонида ўтказилган «Ҳарбий-тиббий эстафета», Қўқонда эса «Йўл патрули» танловларида биринчи ўринни қўлга киритгани тўғрисида хабар берилганди. 4 сентябрь куни мусобақа иштирокчиларини тақдирлаш маросими бўлиб ўтди. Бу ҳақда Мудофаа вазирлиги ахборот ва оммавий коммуникациялар департаменти хабар берди.
Маълум қилинишича, «Ҳарбий-тиббий эстафета» йўналишида 12 857 балл билан Ўзбекистон Мудофаа вазирлиги ҳарбий тиббиётчилари ғолибликни қўлга киритган. Россиялик ҳарбийлар 10 110 балл билан 2-ўринни қўлга киритган бўлса, Беларусь жамоасига эса 6585 балл билан 3-ўрин насиб этган. Кейинги ўринлар қуйидагича тақсимланди – Тожикистон, Вьетнам ва Фаластин.
Тақдирлаш маросимида Ўзбекистон мудофаа вазирининг ўринбосари полковник Ҳамдам Қаршиев иштирок этди.
Шунингдек, Қўқонда ҳам «Йўл патрули» танлови иштирокчиларини тақдирлашга бағишланган тадбир бўлиб ўтди. Бир неча кун давом этган беллашувларда Мудофаа вазирлиги ҳарбий автомобиль назорати ходимлари жамоаси биринчи, Россия иккинчи, Беларусь эса учинчи ўринни қўлга киритди.
Халқаро мусобақанинг тантанали ёпилиш маросимлари катта концерт дастури ва мушакбозлик билан якунланди. Тақдирлаш маросимида ғолиблар қимматбаҳо совғалар, жумладан, Gentra автомобили билан рағбатлантирилди.
Бунга қадар ўзбекистонлик ҳарбийлар «АрМИ—2020» мусобақаларининг «Содиқ дўст» танловида биринчиликни қўлга киритган эди.
Эслатиб ўтамиз, 2019 йилнинг 3—17 август кунлари 10 та давлат ҳудудида «АрМИ–2019» халқаро армия ўйинлари бўлиб ўтган эди. Жиззахдаги «Фориш» полигони биринчи бор «Ҳарбий-тиббий эстафета» йўналишига мезбонлик қилганди.
Изоҳ (0)