Ўзбекистон ОТМларида анъанавий таълим шакли 2021 йилнинг январь—февраль ойларида иккинчи семестр бошланиш вақтида қайта тикланиши мумкин. Бу ҳақда Олий ва ўрта-махсус таълим вазирлиги матбуот котиби Фарҳод Бабашев «Севимли» телеканалига берган интервьюсида маълум қилди, деб ёзмоқда «Gazeta.uz».
Вазирлик вакилининг сўзларига кўра, Олий ва ўрта махсус таълим вазирлиги эпидемиологик вазиятдан келиб чиққан ҳолда ОТМларда анъанавий таълим шаклини ўқув йилининг иккинчи семестридан бошлашни режалаштирмоқда.
Унинг таъкидлашича, 16 март куни таълим муассасаларида карантин эълон қилинганидан бери 80 мингдан ортиқ талаба Тошкент шаҳридан вилоятлардаги уйларига жўнатилган. Университетларга кириш параметрларининг ошиши ва биринчи курс талабаларини ҳисобга олган ҳолда пойтахтга 100 мингдан ортиқ талабанинг келиши кутилмоқда, бу эпидемиологик вазиятга таъсир қилиши мумкин.
«Албатта, анъанавий таълим шакли сифат ва самарадорлиги билан ажралиб туради. Аммо биз университетларни етарли моддий-техника базаси билан таъминлашимиз ва таркибий ўзгаришларни амалга оширишимиз керак», — деди Фарҳод Бабашев.
Эслатиб ўтамиз, Ўзбекистон олий таълим муассасаларида 2020/2021-ўқув йили 2 сентябрдан масофавий шаклда бошланди. Фарход Бабашевнинг айтишича, биринчи курс талабалари бир ойдан сўнг — 2 октябрь куни ўқишни бошлайди.
Ҳозирда олий ўқув юртларининг бакалавр босқичига кириш имтиҳонлари давом этмоқда. Магистратура босқичига кириш имтиҳонлари эса 8—20 сентябрь кунлари бўлиб ўтади.
Изоҳ (0)