Коронавирусга қарши кураш штаби аъзоси Барно Абдусаматова Ўзбекистонда янги туғилган чақалоқларда коронавирус инфекцияси ҳолатлари нисбатан кам қайд этилгани, барча ҳолатлар енгил шаклда кечганини маълум қилди.
Мутахассис, шунингдек, коронавирусга чалинган аёллардан туғилган чақалоқларда коронавирус инфекциясига текширув ўтказилиши борасидаги масалага аниқлик киритган.
«Янги туғилган чақалоқни коронавирус инфекциясига текширув туғилгандан сўнг 12-24 соат ўтгач амалга оширилади. Натижаларни тасдиқлаш учун такрорий тест 24 соатдан кейин қилинади. Текширув учун биоматериал сифатида бурун-ҳалқум ёки оғиз-ҳалқумдан суртма олинади», — дейди Абдусаматова.
Эслатиб ўтамиз, аввалроқ коронавирусга чалинган аҳволи оғир ёки ўта оғир ҳомиладорлар муддатига қарамай туғдирилиши кераклиги, ҳомиладорларнинг иситмаси кўтарилса, у COVID-19 билан касалланган ёки касалланмаганидан қатъи назар стационарга юборилиши шартлиги, Ўзбекистонда туғруқхонага келаётган ҳомиладор аёллардан тест топшириб келиш талаб этилмаслиги, коронавирусга чалинган ҳомиладор аёллар учун қандай шароитлар яратилгани ҳақидаги хабарлар ҳам берилган эди.
Мавзуга доир:
- Тошкентда коронавирусга чалинган ҳомиладор аёл фарзандли бўлди. Туғруқ жараёни етти соат давом этди
- Коронавирусга қарши кураш штаби аъзоси она сути билан озиқланган чақалоқларда коронавирусга қарши кураша олиши кузатилганини маълум қилди
- Коронавирусга чалинган оналар фарзандини эмизиши мумкинлиги маълум қилинди
Изоҳ (0)