Тошкентда 19 ёшли йигит Lacetti’да ЙПХ инспекторини уриб юборгани ва инспектор шифохонанинг реанимация бўлимига ётқизилгани ҳақида хабар берилганди. Тошкент шаҳар ИИББ хабар беришича, 4 сентябрь куни инспектор вафот этган.
Маълум қилинишича, ҳодиса 1 сентябрь куни соат 19:00 ларда Миробод туманида юз берган. Шаҳрисабз кўчасида хизмат олиб бораётган ЙПХ инспектори сержант Салим Умаров Grand Mir меҳмонхонаси олдида 25 ёшли Ж.Б. бошқарувидаги Captiva’ни тўхтатган.
Инспектор Умаров ҳайдовчининг ҳужжатларини текшириб, йўлнинг четига қараб юра бошлаганда Lacetti’ни ҳайдаб кетаётган 19 ёшли Т.М. бошқарувни йўқотиб, тўхтаб турган Captiva билан тўқнашган ва инерсия бўйича ҳаракатни давом эттириб, ЙПХ ходимини уриб кетган.
Қайд этилишича, 4 сентябрь куни соат 07:00 да Тошкент шаҳар ИИББ ЙҲХБ йўл-патруль хизмати бригадаси 2-баталёни 3-мобил гуруҳи инспектори катта сержант Умаров Салим Усмонали ўғли 2020 йилнинг 1 сентябрь куни кечқурун содир бўлган ЙТҲ оқибатида олган жароҳатлари туфайли ҳаётдан кўз юмган.
«Тошкент шаҳар ИИББ раҳбарияти ва шахсий таркиби фидокор ходимнинг ўлими муносабати билан марҳумнинг яқинлари ва қариндошларига чуқур таъзия изҳор этади. Катта сержантнинг ортида уч нафар вояга етмаган фарзандлари қолди. Тошкент шаҳар ИИББ ходимни унутмайди, унинг оиласига доим ёрдам кўрсатилади», – дейилади ИИББ хабарида.
Мавзуга доир:
Изоҳ (0)