COVID-19 коронавирус пандемияси Туркияда тарқалиш даражаси бўйича ўзининг иккинчи чўққисига чиқди. Бу ҳақда мамлакат соғлиқни сақлаш вазири Фахриддин Кўжа маълум қилган, деб ёзмоқда «РИА Новости».
«Пандемия давом этмоқда ва касалланиш ҳолатлари кундан кунга кўпаймоқда. Туркияда биринчи тўлқин ўзининг иккинчи чўққисига кўтарилди. Анқара, Измир, Истанбул, Бурса ва яна бир нечта шаҳарларда вазият анча оғир», — деган Кўжа журналистлар билан суҳбатда.
У мамлакатнинг шарқий вилоятлари – Газиантеп, Шанлиурфа, Мардин ва Арзирумда ҳам касалланиш ҳолатлари кўплиги ҳақида гапирган.
Туркия соғлиқни сақлаш вазири келтирган маълумотга кўра 2 сентябрь куни мамлакатда 1596 та янги касалланиш ҳолати қайд этилган ва бу 15 июндан бери кузатилган энг ёмон натижа. Касалланганларнинг умумий сони 273 301 нафарга етган. Бир сутка ичида 45 киши инфекция асоратлари оқибатида вафот этган, пандемия бошланганидан бери кузатилган ўлимлар сони 6462 тани ташкил қилмоқда. Бир кун аввал Кўжа Туркияда бир кунда 1572 нафар кишида коронавирус инфекцияси аниқлангани, 47 нафар бемор вафот этгани ва бу 15 майдан бери энг катта рақам эканини маълум қилганди.
«Айни вақтда энг кўп касалланиш ҳолатлари қайд этилган ҳудуд Анқара бўлиб турибди. Бу ерда касалланганлар сони Истанбулдагидан икки баравар кўп. Шу сабабли Анқарадаги вазиятни яхшилаш бўйича чора-тадбирлар амалга оширилмоқда, айниқса, ижтимоий масофаланиш қоидаларига эътибор қаратиш лозим. Касалланиш хавфи юқори бўлган ва инфекция оғир ўтадиган ёшдаги кишиларнинг айрим муассасаларга кириши чеклаб қўйилган. Лекин ҳозирча комендантлик соатини эълон қилиш каби чорани қўллаш кун тартибига қўйилмаган», — деган Туркия соғлиқни сақлаш вазири.
Унинг қўшимча қилишича, ҳали пандемия назоратдан чиқиб кетмаган, бироқ айрим вилоятларда вазият анча оғирлашган.
Аввал Туркия статистика институти мамлакатда 2020 йилнинг иккинчи чорагида ялпи ички маҳсулот 9,9 фоизга пасайгани ва бу 1998 йилдан бери қайд этилган рекорд даражадаги пасайиш ҳисобланишини маълум қилган.
Изоҳ (0)