Республика махсус комиссиясининг қарорига биноан Россиянинг Самара вилоятидан 922 нафар ўзбекистонлик поездда Самарқанд шаҳрига олиб келинди. Бу ҳақда Транспорт вазирлиги ахборот хизмати хабар берди.
Вазирлик томонидан маълум қилинишича, Республика махсус комиссияси Ўзбекистон фуқароларини Россиянинг Самара вилоятидан олиб келиш учун Тошкент—Кинель—Тошкент йўналишида темир йўл рейсини ташкил этиш тўғрисида қарор қабул қилган.
Россия ва Қозоғистон томони билан келишувга биноан, 31 август куни «Ўзбекистон темир йўллари» поезди 922 нафар ўзбекистонлик билан «Кинель» станциясидан Ўзбекистонга жўнаган.
Мазкур поезд 2 сентябрь куни Самарқанд шаҳрига етиб келди. Ушбу рейс орқали олиб келинган барча фуқаролар автобусларда вилоятдаги карантин зоналарига етказилди.
Аввалроқ Россиядаги ўзбекистонликларни олиб келиш учун 28 августдан бошлаб Екатеринбург, Ростов-Дон, Новосибирск ва Самарага ҳар ҳафта поезд жўнатилиши ҳақида хабар берилганди.
Бунга қадар Россиянинг Шимолий Кавказ ва Жанубий федерал округларидан 927 нафар, Самара вилоятидан 918 нафар ўзбекистонлик поезд орқали мамлакатга олиб келинган. 9 августда Россиядан поездда олиб келинган 918 нафар ўзбекистонлик Намангандаги карантин зонасига жойлаштирилган. Шунингдек, шу куни бошқа бир поезд Самарадан Самарқандга ўзбекистонликларни олиб келган.
Изоҳ (0)