Ўзбекистон Соғлиқни сақлаш вазирлиги тизимидаги тиббиёт коллежлари ҳамда Абу Али ибн Сино номидаги Жамоат саломатлиги техникумларига абитуриентларнинг ҳужжатларини 2020/2021-ўқув йили учун онлайн қабул қилиш жараёни давом этмоқда. Ҳужжатларни қабул қилиш 25 сентябрга қадар давом этади. Бу ҳақда вазирлик томонидан хабар берилди.
Маълум қилинишича, Ўзбекистон Республикаси таълим муассасаларига ўқишга қабул қилиш бўйича Давлат комиссияси мажлисининг тегишли баённомаларига асосан, тизимида коллеж ва техникумлар бўлган вазирлик ва идоралар қатори, Соғлиқни сақлаш вазирлиги тасарруфидаги коллеж ва техникумларга ҳам 2020/2021-ўқув йили учун грант ҳамда тўлов-контракт асосида қабул квоталари белгиланди.
Унга кўра, соғлиқни сақлаш тизимидаги мавжуд 28 та тиббиёт коллежига 832 та грант, 14346 та тўлов-контракт, 47 та Жамоат саломатлиги техникумига эса 967 та грант, 22543 та тўлов-контракт, жами 1799 та грант ҳамда 36889 та тўлов-контракт ўрни ажратилди. Республика бўйича 38688 нафар ўқувчи тиббиёт коллежлари ва Жамоат саломатлиги техникумларига қамраб олинади.
Абитуриентлар ва уларнинг ота-оналари ўзларини қизиқтирган саволлари билан Олий ва ўрта махсус таълим вазирлигида +998712461192 телефон рақамида ташкил этилган Call-марказига, шунингдек, Касбий таълимни ривожлантириш ва мувофиқлаштириш ҳудудий бошқармаларида ташкил этилган Call-марказларига мурожаат этиши мумкин. Ушбу марказлар ҳафтанинг душанба—шанба кунлари соат 09:00 дан 18:00 га қадар фаолият кўрсатади.
Аввалроқ Ўзбекистонда коллежларга қабул квоталари тасдиқлангани ҳақида хабар берилганди.
Изоҳ (0)