Германия ҳукумати Навальний «Новичок»га ўхшаш модда билан заҳарланганини маълум қилди

Сиёсатчи Алексей Навальний Россияда асаб тизимини фалаж қилувчи, таркиби жиҳатдан «Новичок» моддасига ўхшаш жанговар модда билан заҳарланган. Бу ҳақда Германия ҳукумати маълум қилди, деб ёзмоқда Meduza.

Қайд этилишича, сиёсатчи даволанаётган «Шарите» клиникаси шифокорларининг сўровига биноан ўтказилган тестлар натижалари Навальнийнинг организмида заҳар излари мавжудлигини кўрсатган.

«Алексей Навальний Россияда кимёвий заҳарловчи модда қўллаган ҳолда амалга оширилган ҳужум қурбони бўлди», — дейилади Германия ҳукумати баёнотида.

Маълум қилинишича, Германия ҳукумати таҳлил натижалари ҳақида Европа Иттифоқи ва НАТОдаги ҳамкорларига, шунингдек, Кимёвий қуролни тақиқлаш бўйича ташкилотга хабар беради.

Россиянинг Германиядаги элчиси ҳам таҳлил натижалари ҳақида расман хабардор қилинади. «Биз Россия ҳукуматини бу ҳодиса бўйича тушунтириш беришга чақирамиз», — дейилади баёнотда.

Россия Ташқи ишлар вазирлигининг маълум қилишича, Навальнийнинг заҳарлангани муносабати билан Россия Бош прокуратураси томонидан бир неча кун олдин Германияга жўнатилган сўровга жавоб кутмоқда. Россия президенти матбуот котиби Дмитрий Песковнинг маълум қилишича, ҳозирча Кремлга Германия ҳукуматидан ҳеч қандай маълумот келиб тушмаган.

Алексей Навальний 20 августдан буён кома ҳолатида. Комадаги дастлабки икки кунни сиёсатчи Россиянинг Омск шаҳридаги клиникада ўтказди, шундан сўнг у Берлинга олиб кетилди. Сиёсатчининг сафдошлари ҳодисанинг бошидан буён унинг заҳарланганини айтиб келмоқда. Уларнинг гумон қилишича, россиялик шифокорлар сиёсатчининг организмида заҳар изини топиш қийин бўлиши учун уни атайлаб клиникада ушлаб турган ва кетишига рухсат бермаган бўлиши мумкин.

«Шарите» клиникаси шифокорлари Навальний етиб келганидан кейин икки кун ўтиб унинг холинестераза ингибиторлари гуруҳидан бўлган модда билан заҳарланганини маълум қилган.

Россиялик шифокорларнинг маълум қилишича, Навальнийнинг Россияда олинган таҳлиллари унинг организмида қандайдир заҳар борлигини аниқламаган. Россия Бош прокуратураси текширув ўтказган. Унинг натижасига кўра, ҳодиса муносабати билан жиноий иш очишга асос мавжуд эмас деб топилган.