Жаҳон пандемияси шароитида цензура, репрессия тенденциялари, журналистларга нисбатан таҳдидлар ва ҳужумлар, шунингдек, бунга жавобгарларнинг жазосиз қолиши кучайди. «Gazeta.uz»нинг ёзишича, бу ҳақда БМТ Инсон ҳуқуқлари бўйича Олий комиссари Мишель Бачелет 1 сентябрь куни Женевада бўлиб ўтган тадбирда маълум қилди.
Унинг таъкидлашича, бир қатор мамлакатларда пандемия «сиёсийлаштирилмоқда» ва сиёсатчиларнинг унинг оқибатларида ўз мухолифларини айблашга уриниши журналистларга нисбатан таҳдидлар, ҳибсга олишлар ва туҳмат қилиш кампанияларига олиб келди.
«Айрим ҳукуматлар, афтидан, соғлиқни сақлаш инқирозидан янада кенгроқ ва асоссиз — танқид ва норозиликка қарши репрессив чоралар учун баҳона сифатида ишлатмоқда», — деб таъкидлаган Олий комиссар.
Унинг айтишича, бундай чоралар ОАВ офислари, сайтларнинг ёпилиши, интернетнинг ўчирилиши ва цензуранинг бошқа шаклларини, шунингдек, журналистларни ўзбошимчалик билан қўлга олиш ва ҳибсда сақлашларни ўз ичига олади.
«Бундай ҳаракатлар жамоат саломатлиги, ривожланиш, инсон ҳуқуқлари ва демократияга зарар етказишини ва ўзларини назоратдан ҳимоя қилмоқчи бўлган бир қатор одамларнинг фақат тор доирадаги ва қисқа муддатли манфаатларига фойда келтиришини пухта англашимиз керак», — дея қўшимча қилган у.
Мишель Бачелетнинг фикрича, одамларга аниқ маълумот берилмаса ёки ҳукуматнинг хатти-ҳаракатлари ёки дезинформацияси расмий баёнотларга ишончни йўқоца, улар ўзларини касалланишдан самарали ҳимоя қила олмайди.
«Ҳеч бир журналист ёки ОАВ ходими ўзларининг репортажлари туфайли жиноий жавобгарликка тортилмаслиги ёки таҳдид қилинмаслиги керак. Журналистнинг ҳар бир ҳибсга олиниши ва уларга қилинган ҳар қандай ҳужум бутун жамиятга сигнал беради: ҳақиқатни излаш ва ахборот олиш, фикр билдириш ва иштирок этиш ҳуқуқи расмийлар томонидан ҳимоя қилинмаган», — дея ўз фикрини якунлаган Олий комиссар.
Мавзуга доир: Сўхлик блогер Дадахон Ҳайдаров озод этилди
Изоҳ (0)