АҚШ Ўзбекистонга 200 та сунъий нафас бериш аппаратини тақдим этди

Соғлиқни сақлаш вазири Алишер Шодмонов ва АҚШнинг Ўзбекистондаги фавқулодда ва мухтор элчиси Даниел Розенблюм иштирокида АҚШ Халқаро тараққиёт агентлиги (USAID) орқали коронавирусга қарши курашишда ёрдам бериш мақсадида тақдим этилган 200 та замонавий сунъий нафас бериш аппаратларини топшириш маросими бўлиб ўтди. Бу ҳақда Соғлиқни сақлаш вазирлиги ахборот хизмати хабар қилди.

Маълум қилинишича, ҳозирда Ўзбекистондаги тиббиёт муассасаларида 2 мингдан ошиқ сунъий нафас бериш аппарати мавжуд. Умумий қиймати қарийб 2,6 миллион доллар бўлган 200 та сунъий нафас бериш аппарати эса АҚШ томонидан аввалроқ етказиб берилган 6 миллион доллардан ортиқ кўмагининг давоми бўлди.

«Ўзбекистон кўп йиллардан бери АҚШ, жумладан, Халқаро тараққиёт агентлиги (USAID) билан ҳамкорлик қилиб келмоқда. Айниқса, тиббий таълим, кадрларни қайта тайёрлаш, илм-фанни ривожлантириш, тиббий хизмат сифатини ошириш, бирламчи тиббиёт ва даволаш муассасалари фаолиятини яхшилаш йўналишларидаги ҳамкорлик ўз самарасини бермоқда.

Мутахассисларимиз АҚШнинг етакчи клиникаларида амалиёт ўтаб келишмоқда. Биргина 2019 йилда 14 нафар мутахассис малака ошириб қайтди. Мичиган, Сент-Луис, Шимолий Каролина университетлари профессор ва олимлари доимий тарзда юртимизга келиб, тажриба алмашишмоқда.

Тақдим этилган аппаратларнинг афзаллиги фойдаланиш учун содда, кўп функцияли ҳамда беморларни турли транспорт воситаларида ташиш жараёнида ҳам қўлланилиши мумкин эканлигидир. Ушбу инсонпарварлик ёрдами Ўзбекистон ва АҚШ ўртасида коронавирус пандемиясини енгиш борасида олиб борилаётган ҳамкорлик алоқаларининг мантиқий давоми бўлди», – деди соғлиқни сақлаш вазири Алишер Шодмонов.

Қайд этилишича, тақдим этилган сунъий нафас бериш аппаратлари Ўзбекистондаги соғлиқни сақлаш муассасаларининг техник инфратузилмаси, ҳатто минтақавий иқлимни ҳам ҳисобга олган ҳолда махсус буюртма асосида ишлаб чиқарилган.

Хусусиятларига кўра, ушбу қурилмалар стационар даволанишда интенсив терапия учун ҳам, аэротиббий транспортда ёки тез ёрдам машиналарида беморни ташиш пайтида ҳам қўлланилади.

«COVID-19 шароитида барча мамлакатлар глобал ҳамжамият сифатида ҳаракат қилиши лозим. Бу чегара билмас вирус барчамизга ўз таъсирини ўтказмоқда. Шу боис мамлакатимиз унга қарши курашишда зарур бўлган воситалар ҳамда техник кўмак тақдим этиш орқали Ўзбекистон ва бошқа давлатларни қўллаб-қувватламоқда. Америка хусусий сектори билан ҳамкорликда етказиб берилган бу сунъий нафас бериш ускуналари Ўзбекистонда оғир касалларни даволаш имкониятини янада мустаҳкамлайди», – деди АҚШнинг Ўзбекистондаги фавқулодда ва мухтор элчиси Даниел Розенблюм.

Таъкидланишича, Халқаро тараққиёт агентлиги (USAID) бу ускуналарни мамлакат бўйлаб тиббиёт муассасаларига етказиб бериш, ташиш ва жойлаштиришни режалаштиришда Ўзбекистон ва Америка Қўшма Штатлардаги соғлиқни сақлаш вазирлиги ҳамда бошқа манфаатдор томонлар билан иш олиб бормоқда.