Тошкент шаҳар Санитария-эпидемиологик осойишталик маркази иммунопрофилактика бўлими мудири Вазира Муталова АОКАда ўтказилган брифингда Ўзбекистонда грипп ва ўткир респиратор касалликларига қарши кураш ҳақида гапириб, гриппга қарши вакциналар билан кимлар бепул эмланишини маълум қилди.
Республикамизда аҳоли ўртасида таҳдид гуруҳига мансуб контингент – аҳоли билан бевосита мулоқотда ишлайдиган тиббиёт ходимлари, мактаб ўқитувчилари, мактабгача таълим муассасалари ходимлари орасида бугунги кунда грипп ва унинг асоратлари, пневмония касалликларининг олдини олиш борасида Ўзбекистон Президентининг «Аҳолини ижтимоий қўллаб-қувватлашга қаратилган қўшимча чора-тадбирлар тўғрисида»ги 4815-сонли қарори асосида 2020 йилнинг 1 октябридан бошлаб гриппга қарши бепул эмлаш ишларини олиб бориш белгиланган.Ушбу тадбирни амалга ошириш учун бугунги кунда Давлат санитария хизмати томонидан ўқитувчилар, тиббиёт ходимлари ва мактабгача таълим муассасалари ходимлари сонини аниқлаш, уларнинг рўйхатини тузиш каби ишлар амалга оширилмоқда.
Республика бўйича 516 минг 174 нафар ўқитувчи, мактабгача таълим муассасаларининг 223 минг 426 нафар ходими ҳамда 534 мингдан ортиқ тиббиёт ходими – яъни, 1 миллион 273 минг нафардан ортиқ контингентни гриппга қарши эмлаш режалаштирилмоқда.
Бугунги кунда республика бўйича 4 минг нафар вакцинатор мавжуд бўлса, уларнинг дублёрлари билан 8 минг нафардан ортиқ эмлаш ҳамширалари ушбу тадбирларни олиб бориш учун семинар машғулотлари олиб борилди.
Сентябрь ойида давлатимиз томонидан 1 миллион ортиқ гриппга қарши вакцина олиб келиниши режалаштирилмоқда. Эмлаш хавфсизлигига тўлиқ эришиш учун мактаблар, мактабгача таълим муассасаларидаги тиббиёт хоналари ҳамда мактаб, мактабгача таълим муассасаларига яқин жойлашган оилавий поликлиникаларнинг эмлаш хоналарида ушбу тадбирларни амалга ошириш ташкиллаштирилмоқда.
Вазира Муталова, Тошкент шаҳар Санитария-эпидемиологик осойишталик маркази иммунопрофилактика бўлими мудири
Аввалроқ Ўзбекистон Соғлиқни сақлаш вазирлиги ҳузуридаги Коронавирусга қарши курашиш штаби аъзоси, эпидемиолог Рустам Икромов аҳолини грипп ва пневмонияга қарши эмлаш бўйича чора-тадбирлар режаси ҳукуматга тақдим этилгани, агар режа тасдиқланса, сентябрь ойидан эмлаш ишлари бошланишини билдирган эди.
Бундан ташқари, Юнусобод туманидаги 50-оилавий поликлиника бош шифокори Шоира Абдусатторова «туман ҳокими раҳбарлигида ўтказилган йиғилишда туман аҳолисининг камида 70 фоизини гриппга қарши оммавий эмлашга келишиб олингани»ни маълум қилган эди. Унинг айтишича, 2018 ва 2019 йилларда Юнусободда аҳолининг фақат бир фоизи гриппга қарши эмланган.
Изоҳ (0)