Ўзбекистонда 2020/2021-ўқув йилида олий таълим муассасаларига қабул қилинадиган 1-босқич талабалари учун ўқиш 2 октябрдан бошланади. Бу ҳақда Олий ва ўрта махсус таълим вазирлиги матбуот котиби Фарҳод Бабашев АОКА штабида ўтказилган брифингда маълум қилди.
«2 сентябрда олий таълим муассасаларига кириш учун тест ва ижодий имтиҳонлар бошланган. Бу абитуриентлар ўқишга қабул қилингач, 2 октябрдан ўқишни бошлаши режалаштирилмоқда.
Олий ўқув юртларининг 2—4-курс талабалари учун эса ўқиш бугун, 2 сентябрда бошланиши июнь ойидан бери айтиб келинмоқда», — дея Бабашев сўзларини келтирмоқда «Kun.uz».
Вазирлик расмийси академик лицейларда ўқишнинг бошланиш муддатлари ҳақида ҳам маълумот берган бўлиб, унга кўра, академик лицейларда, олий таълим муассасалари сингари бугун, 2 сентябрдан ўқиш расман масофавий шаклда бошланди.
«Академик лицейларда таълимни масофавий ёки анъанавий шаклда бошлаш бўйича ота-оналар ўртасида сўровномалар ўтказилган. Натижалар таҳлил қилинди. 2020 йил 7—14 сентябрь кунлари академик лицейларнинг 1-босқичига қабул қилиш бўйича тест синовлари ўтказилиб, натижалари эълон қилиниши билан таълим анъанавий ёки масофавий шаклда давом эттирилиши юзасидан қўшимча хабар берилади», — деб қайд этган Фарҳод Бабашев.
Изоҳ (0)