Андижон вилояти ҳокими ўринбосари Манзура Юнусова ишдан бўшади

Андижон вилояти ҳокимининг ўринбосари, Маҳалла ва оилани қўллаб-қувватлаш бошқармаси бошлиғи Манзура Юнусова ўз аризасига мувофиқ эгаллаб турган лавозимидан озод этилди. Ушбу хабарни вилоят ҳокимлиги ахборот хизмати ўзининг ижтимоий тармоқлардаги саҳифаларида тасдиқлади, деб хабар берди «Дарё» мухбири.

Собиқ ўринбосар Манзура Юнусова 1971 йил Андижон туманида туғилган. 1994 йилда Андижон давлат университетининг тарих факультетини тамомлаб, университетда ассистент, кафедра тадқиқотчиси, кафедра ассистенти, катта ўқитувчи, кафедра мудири лавозимларида фаолият олиб борган.

2012—2020 йилларда Андижон вилояти ҳокими ўринбосари, вилоят хотин-қизлар қўмитаси раиси лавозимида ишлаган Манзура Юнусова шу йилнинг февралида Маҳалла ва оилани қўллаб-қувватлаш бошқармаси бошлиғи лавозимига тайинланиб, ҳоким ўринбосари мақомини сақлаб қолганди.

«Дарё» мухбирининг аниқлик киритишича, сиёсий фанлар номзоди, доцент Манзура Юнусова ўз фаолиятини Андижон давлат университетида давом эттириш мумкин. Лекин қайси лавозимда бунга аниқлик киритилмаган.

Эслатиб ўтамиз, Юнусова хоним 2019 йилнинг май ойида ижтимоий тармоқларда кўплаб муҳокамаларга сабаб бўлган «Андижонча спектакл» ташкилотчиларидан бири бўлиши мумкин. Президент Шавкат Мирзиёевнинг май ойида Андижонга ташрифи давомида у ва унинг жамоаси ижтимоий ҳимояга муҳтож бир неча аёлни танлаб олиб, уларга янги уй берилганини маълум қилган. Ва аёлларнинг бу ҳақда «Ўзбекистон 24» телеканалига интервью бериб, ҳаётдан мамнун эканлигини айтишига бош-қош бўлган. Ташриф якунлангач эса аёллар коттежлардан чиқариб юборилганида, Манзура Юнусова ҳамда унинг жамоасининг қилмиши жамоатчиликка ошкор бўлган.

Шунингдек, Андижон шаҳар халқ таълими бўлими тасарруфидаги мактабларда ишловчи 25-35 ёшдаги, турмушга чиқмаган ва турмушидан ажраган аёлларнинг алоҳида рўйхати юритилишига оид маълумотлар тарқалиши ҳам Манзура Юнусова даврига тўғри келади.