Тойлоқ туман ҳокимлиги 200 дан ортиқ ўзига тўқ оилалар кам таъминланганлар рўйхатига киритилганини рад этди

«Дарё»да Самарқандда асли фермер бўлган маҳалла раиси камбағаллар учун ажратилган ёрдам пулини ўз ишчиларига тарқатгани ҳақида хабар берилганди. Мазкур хабарда Олий Мажлис Қонунчилик палатаси депутати Наврўз Ризаев вилоятнинг Тойлоқ туманида 200 дан ортиқ ўзига тўқ оилалар кам таъминланганлар рўйхатига киритилганини таъкидлаганди.

Мазкур хабарга Тойлоқ туман ҳокимлиги ахборот хизмати муносабат билдириб, 200 дан ортиқ ўзига тўқ оилалар кам таъминланганлар рўйхатига киритилганини рад этди.

«Мақолада Тойлоқ туманига тегишли бор йўғи битта жумла киритилган. Унда айтилишича, Тойлоқ туманида 200 дан ортиқ ўзига тўқ оилалар кам таъминланганлар рўйхатига киритилган эмиш», — дейилади ҳокимлик ахборот хизмати хабарида.

Ҳокимлик ахборот хизматининг ёзишича, депутат айтган ахборот туман мутасаддиларини ҳайратга солган.

«Мақоладаги ушбу хабар туман мутасаддиларини ҳайратга солди. Чунки туманда мавжуд 50 та маҳалла фуқаролар йиғини раислари орасида фермер бўлиб ишловчилар йўқ. Боз устига мақолада айтилганидек, камбағаллар учун ажратилган ёрдам пулини ўз ишчиларига тарқатиш ҳолати ҳам кузатилмаган. Қолаверса, 200 юздан ортиқ ўзига тўқ оилалар кам таъминланганлар рўйхатига киритилган, деган гап ҳам асоссиз. Ҳурматли депутатимиз Наврўз Ризаев ва «Дарё» мухбиридан бу маълумотни қаердан олгани ва нимага асосланиб, бундай ахборот тарқатгани бўйича изоҳ беришини сўраб қоламиз», — дея мазкур ахборотни рад этишга уринади ҳокимлик.

Ҳолбуки, маҳалла раисларининг фермер хўжалиги борлиги ва моддий ёрдам пулини ишчиларига ойлик сўрамаслик шарти билан бериб юборганлиги ҳақидаги жумлада айнан Тойлоқ тумани тилга олинмаган.

Эслатиб ўтамиз, «Дарё» мухбири Фарҳод Норбўтаев билан суҳбатлашган Олий Мажлис депутати Наврўз Ризаев Тойлоқ туманида 200 дан ортиқ ўзига тўқ оилалар эҳтиёжмандлар рўйхатига киритилганини алоҳида таъкидлаган ва депутатлар аралашуви билан мазкур рўйхат ўзгартирилганини маълум қилганди.