Ўзбекистонда 2 сентябрдан ижодий имтиҳонлар бошланди

Бугун, 2 сентябрь куни алоҳида иқтидор талаб этиладиган бакалавриат таълим йўналишларига кириш имтиҳонлари бошланди, дея хабар бермоқда Олий ва ўрта махсус таълим вазирлиги.

Қайд этилишича, Андижон давлат университетида мавжуд 10 та алоҳида иқтидор талаб этадиган йўналишга 8 мингдан ортиқ абитуриент рўйхатдан ўтган. Бугун 6 та таълим йўналишига имтиҳонлар бошланди. Имтиҳонлар икки сменада ташкил этилиши белгиланган.

Вазирликнинг хабар беришича, абитуриентларнинг хавфсизлиги ва соғлигини асраш учун барча чоралар кўрилган. Университет ҳудудига кириш дезинфекция туннеллари ўрнатилган. Ҳар бир абитуриент туннелдан ўтгач, иссиғи ўлчаниб, антисептик воситалар билан қўллари тозалаб, ўтказилмоқда. Имтиҳон ўтказиладиган хона ва ҳудудларда масъуллар масофани сақлашни назорат қилмоқда. Ҳозирга қадар вирус аломатлари бор абитуриентлар кузатилмаган.

Имтиҳонларни шаффоф ва адолатли ўтказиш мақсадида имтиҳон олувчи мутахассислар мамлакатнинг бошқа ОТМларидан жалб этилган. Мусиқа таълими, чолғу ижрочилиги, анъанавий хонандалик йўналишларида Ўзбекистон Консерваторияси, ТСМГ ва ранг-тасвир Камолиддин Беҳзод номидаги Миллий рассомчилик ва дизайн институти мутахассислари, Жисмоний маданият, футбол ва бокс йўналишларида эса таниқли мураббийлар, жаҳон ва Осиё чемпионлари имтиҳон олмоқда.

Университетдаги имтиҳонлар жараёнларини реал вақт режимида онлайн кузатиш имконини берувчи махсус платформаси ишга туширилиши бўлган. Имтиҳон ўтказиладиган 6 та ҳудудда 20 та веб-камера ўрнатилиб, абитуриентларнинг ота-оналари ва яқинлари бемалол уйдан туриб имтиҳонларни кузатиб боришлари учун шароит яратилган.

Тиббиёт ходимлари ҳар бир абитуриентни, айниқса спорт йўналишлари бўйича имтиҳон топшираётганларни соғлигини алоҳида назорат қилмоқда. Улар учун гигиена талабларига риоя қилган ҳолда сув ва салқин ичимликлар ташкил қилинган. Хавфсизликни таъминлаш учун Миллий гвардия ва Ички ишлар ходимлари жалб этилган.