Фарзанд тарбияси масъулият, сабр ва билим талаб этади. Болаларнинг қаҳрамони бўлмиш оналар ҳамиша ўзини бахтли, хушмуомала тутишга ўрганиши керак. Лекин муаммо ҳар кимнинг ҳам ўзига яраша характери ва камчиликларида. Чунки уларни яшириб юришнинг доим ҳам иложи йўқ, эртами, кечми асабийлашган пайтда ҳаммаси аён бўлади. Ҳавас қилса, арзигулик идеал оналар эса ўзидаги барча кечинмалар фарзандига юқишини ўйлаб, қалтис вазиятда ҳам сокин бўлишга ҳаракат қилади.

Фото: «Домашний очаг»

Кунни режалаштириш шарт эмас

Аслида ҳаёт ялтироқ журналдаги каби расмларга ўхшамайди. Шунингдек, фарзандларга ҳам ҳар куни кутилмаганда дуч келадиган вазиятга мос чиройли, замонавий кийимларни кийдириш асло мумкин эмас. Болалар учун худди кинолардагидек ҳар ҳафта қимматбаҳо совғалар харид қилишни ҳам асло имкони йўқ. Ҳатто кунига уч маҳал фойдали таомлар истеъмол қилишнинг ҳам иложи бўлмаса керак. Баъзида кунни шунчаки пижамада телевизор қаршисида ўтказиш эса ҳақиқат. Атрофдагилар учун сунъийликдан воз кечиш керак. Боалар табиийликни ва эркинликни хуш кўради. Уларни қандайдир қолип ичига жойлашнинг кераги йўқ. Она ўзини эркин ва осойишта тутса, фарзандлар ҳам ундан миннатдор бўлади.

Доимий шовқинларга ўрганиш керак

Болаларни тинчлантириш учун беҳуда вақт сарфламаслик зарур. Баланд овозда қўрқитиш ҳам фойда бермайди. Бу билан оналар фақатгина ўзини чарчатади. Болаларнинг шовқин-суронини шунчаки уларнинг қувончи ва бахтиёрлиги деб қабул қилиш керак. Шунда уларнинг бақир-чақир овози асабларни бузишга эмас, кайфиятни кўтаришга сабаб бўлади.

Болалар ўзлари билан фахрлансин

Ҳар оқшом ёки ўйинчоқлар хона бўйлаб сочилиб ётган пайтда фарзандларга уларни йиғиштиришга буюриш ҳамма оналар учун таниш ҳолат. Улар гарчи кўнгилдагидек қилиб ишни амалга оширолмаса-да, лекин бунинг учун ҳаракат бор. Шундай вақтларда болаларнинг қилган кичик ёрдамларига миннатдорлик билдирилиши керак. Бу, айниқса, оналар учун тарбия беришнинг энг яхши ва осон йўли. Қилган арзимас иши учун ташаккур эшитган ҳар қандай бола яна уни такрорлашга ва яхшироқ бажаришга интилади.

Болалар хато қилганда аралашмаслик керак

Хато қилиш боалардан тортиб катталаргача учрайди, бу табиий жараён. Аввал хато қилинади, хулоса чиқарилади ва такрорламасликка уриниш пайдо бўлади. Болалар эндигина велосипед ҳайдашни машқ қилаётган бўлса ёки ҳуснихат ёзишга киришган бўлса, уларга хатоларни англатишда эҳтиёт бўлиш талаб этилади. Уларнинг илк вазифаларига аралашиш иштиёқни сўндириб юбориши мумкин. Мустақил бўлишига ва хато қилишга рухсат бериш келажакда иродали фарзанд бўлиб камол топишига ёрдам беради.

Шошилиш ҳеч нарсани ўзгартиролмайди

Оналар кун давомида қанча уй юмушларини бажармасин, ҳеч нарсага улгурмагандек туюлаверади. Ростдан ҳам шундай, бугун ювилиши керак бўлган кийимлар эртага ҳам ювилиши керак. Кеча ишлатилган қозон-товоқлар нафақат эртага, балки бир умр ишлатилади. Шунинг учун шошқалоқлик фақатгина асабларни таранглаштиришга олиб келади. Натижада онадаги доимий асабийлик ортидан болалар ҳам асабий бўлишни, бирор ишда доимо шошқалоқлик қилишни, бордию эплай олмаса бақир-чақир қилишни ҳам бошлайди. Шунинг учун ҳам хотиржам оналардан хотиржам фарзандлар пайдо бўлади. Орзудагидек она бўлиш учун юқоридаги барча тавсияларга амал қилиш зарур.