Ўзбекистонда 2 сентябрдан давлат олий таълим муассасаларига кириш имтиҳонлари бошланди. Коронавирус пандемияси сабабли тест имтиҳонлари очиқ стадион ва хиёбонларда олиниши белгиланган эди. Кириш имтиҳонлари шаффоф тарзда ўтиши, назорат кучайтирилиши юзасидан тегишли ишлар олиб борилди. Хусусан, ҳар бир имтиҳон олинадиган жой махсус кузатув камералар билан жиҳозланди.
Шунга қарамай, ижтимоий тармоқларда бевосита тест ечиш жараёнида олинган тест саволлари китобларининг суратлари тарқала бошлади. Мисол учун, Telegram’даги «Абитуриент-2020» гуруҳида кимё, математика ва бошқа фанлар мажмуасидаги тест саволлари акс этган суратлар эълон қилинган.
Шунингдек, тест имтиҳони жойларининг биридан ташкил этилган жонли эфирда абитуриентлардан бири мобил қурилмадан фойдаланаётганини кўриш мумкин. Бироқ бу ҳолат айнан қайси жойда бўлгани ҳақида аниқ маълумот йўқ. Давлат тест марказидан маълум қилишларича, ижтимоий тармоқларда тарқалган расмлар ўрганилмоқда ва ўрганиш натижасида керакли чоралар кўрилади.
Қўлида телефон ушлаб турган абитуриент
Ижтимоий тармоқларда қўлида телефон ушлаб турган абитуриент сурати ҳам тарқалди. Хушнуд Худойбердиевнинг аниқлик киритишича, ушбу сурат 25 август куни Андижонда бўлиб ўтган репитицион тест пайтида олинган. «Репетицион тест пайти телефон олиб кириш бемалол бўлган», — дейди у.
Хушнуд Худойбердиевнинг қайд этишича, тест жараёнларидан саволлар китобларининг суратлари тарқалиши «кутилган ҳолат эди», чунки телефонларни 100 фоиз ушлаб қолишнинг иложи йўқ, «асосийси телефондан оммавий фойдаланиш ўйинчоқ бўлиб кетмаса бўлди, яккам-дуккам ҳолатлар хавотирли эмас».
«Аммо шундай бўлса-да, бу расмлар бўйича ДТМ тегишли тушунтириш бериши керак. Шунингдек, жойларда назорат ҳам янада кучайтирилиши лозим», — дея қўшимча қилган Худойбердиев. У абитуриентларни имтиҳон вақтида телефондан фойдаланаётган тенгдошлари ҳақида дарҳол назоратчиларга хабар беришга чақирган.
Эслатиб ўтамиз, тест синовлари ўтказиладиган бинога киришда микрокалкулятор, луғат, жадвал, китоб, уяли телефон, телекоммуникация қурилмалари, шпаргалкалар ва бошқа воситаларни олиб киришга уринган абитуриентлар кириш жойининг ўзидаёқ тест синовларидан четлаштирилади.
Аввалроқ бош вазир ўринбосари Беҳзод Мусаев кириш имтиҳонларида турли шпаргалкалардан фойдаланганлик ҳолатлари учун қоидабузар абитуриентларни кейинги йилги имтиҳондан ҳам четлаштириш масаласи кўриб чиқилаётганини маълум қилган эди.
Изоҳ (0)