Наманганда ОТМларга қабул учун тест синовлари бошланди. Уларда 90 минг нафарга яқин абитуриент иштирок этади

Наманган вилоятида олий таълим муассасаларига қабул учун тест синовлари бошланди. Бу ҳақда «Дарё» мухбири Азизбек Абдувалиев хабар бермоқда.

Тест синовларида 11 кун давомида жами 89605 нафар абитуриент иштирок этиши кўзда тутилган. Улардан 79024 нафари вилоятдаги 3 та ОТМнинг кундузги, сиртқи ва кечки таълим йўналишларига ҳужжат топширган.

Вилоятда тест синовлари Наманган шаҳридаги «Баркамол авлод» спорт мажмуаси, «Динамо», «Навбаҳор-Умид» ўйингоҳлари ҳамда Тўрақўрғон туманидаги «Ёшлик» стадионларида бўлиб ўтмоқда. Абитуриентларни шаҳар-туманлардан тест синовлари ўтказиладиган манзилларга етказиш учун йўналишсиз автобуслар қатнови ташкил этилди.

Имтиҳонлар бўлиб ўтадиган мажмуа ва ўйингоҳларда тез тиббий ёрдам хоналари, тест синовларини мувофиқлаштириш штаблари ташкил этилди. Уларда 8 та дезинфекцион туннел ўрнатилди, етарли миқдорда қадоқланган сув, тиббий ниқоб ва қўлқоплар ҳамда антисептик воситалар билан таъминланди.

Тест синовлари ўтказиладиган ҳудудларни назорат қилиш учун 72 та устун тайёрланиб, камералар, шахсни идентификациялаш воситалари, видеофиксация қурилмалари ўрнатилди. 270 нафар малакали мутахассис назоратчи сифатида танлаб олиниб, Санитария-эпидемиология осойишталик маркази, Соғлиқни сақлаш, Ички ишлар, Миллий гвардия ҳамда хизмат кўрсатиш тизимлари ходимлари бириктирилди.

Маълумот учун, вилоятда олий таълим муассасаларига 2020/2021-ўқув йили қабул квотаси жами 7850 тани ташкил қилмоқда. Бу кўрсаткич ўтган ўқув йилига нисбатан 2075 тага ёки 73,6 фоизга ошган.