Ўзбекистонда жума намозларини масжидларда ўқишга рухсат берилди. Бу ҳақда коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорида айтилади.
Қарорга кўра, диний ташкилотларда жамоавий ибодатларни (жума ва шанба, якшанбалик диний хизматлар) амалга оширишга рухсат берилади.
«Kun.uz»нинг махсус комиссия аъзоси, бош вазир ўринбосари Азиз Абдуҳакимовга таяниб хабар қилишича, жамоавий ибодатларни 2020 йил 4 сентябрь жума кунидан бошлаб амалга ошириш мумкин бўлади.
Бунда ушбу объектлар қуйидаги санитария қоидаларига риоя этиши талаб этилади:
- жамоавий ибодатни ўтказиш учун ташриф буюрувчилар ўртасида ижтимоий масофани таъминлаш;
- диний ташкилот ходимлари ва ташриф буюрувчиларнинг тиббий ниқобда бўлиши;
- санитария-гигиена ва дезинфекция талабларига қатъий риоя этиш, бино хоналарни доимий равишда дезинфекция қилиш, уларга кириш-чиқиш жойларини пирометрлар, антисептик воситалар ва дезинфексион «тўшак»лар билан жиҳозлаш;
- ҳар бир диний ибодатдан кейин бино (хона) ва ундаги жиҳозларнинг юза қисмини дезинфексион воситалар билан тозалаш;
- бино ва хоналарга, шунингдек, ҳаво айлантириш тизимига зарарсизлантириш анжомларини (ультрабинафша лампалар ва б.) ўрнатиш.
- тана ҳарорати 37 даража ва ундан юқори бўлган ёки инфекция аломатлари мавжуд бўлган ташриф буюрувчиларни киритмаслик;
- диний ташкилотларга кириш ва чиқиш жойларида аҳолининг тўпланишига қатъий йўл қўймаслик.
Эслатиб ўтамиз, Ўзбекистондаги барча 2070 та жоме масжиди 2020 йил 17 август куни бомдод намозидан бошлаб ўз фаолиятини қайта бошлаган. Бунда масжидлар ҳафтада ҳар куни ўз иш фаолиятини олиб бориши, фақат жума намози эпидемиологик вазият барқарорлашгунга қадар вақтинча адо этилмаслиги қайд этилганди.
Изоҳ (0)