Республика махсус комиссияси қарори билан «Коронавирус пандемияси даврида мунтазам халқаро авиақатновларни амалга ошириш тартиби тўғрисида»ги вақтинчалик йўриқнома тасдиқланди.
Шу боис, тегишли соҳа масъулларига барча турдаги халқаро қатновларни (авиа, темир йўл ва автомобиль) тиклаш бўйича хорижий мамлакатлар билан музокаралар ўтказган ҳолда қатновларни босқичма-босқич тиклаш чораларини кўриш вазифаси юклатилди.
Мазкур вақтинчалик йўриқнома 2020 йил 1 сентябрдан эътиборан кучга киради. Йўриқнома кучга киргандан сўнг хориждаги фуқароларни тўлов асосида меҳмонхонага карантинга жойлаштириш шарти билан чартер қатновларини ташкил этиш бўйича туроператорлар ҳамда авиакомпанияларга рухсатномалар бериш амалиёти тўхтатилади. Шу билан бирга, аввал берилган рухсатномалар 2020 йил 1 октябрга қадар амал қилади.
Шунингдек, қўшни давлатларда рўйхатдан ўтган ва Ўзбекистонга вақтинчалик олиб кирилган автотранспорт воситаларини Ўзбекистон ҳудудидан олиб чиқилишига рухсат берилди ҳамда қўшимча қулайликлар яратиш мақсадида бошқа хорижий давлатлар автотранспорт воситаларини қайтариб олиб чиқиш муддати 2020 йил 1 ноябрга қадар узайтирилди.
Шу билан бирга, Республика махсус комиссияси томонидан Ўзбекистон мустақиллигининг 29 йиллик айёмини оила даврасида санитария-гигиена қоида ва талабларига риоя этган ҳолда нишонлаш тавсия этилмоқда.
Аввалроқ Ўзбекистон ва Қирғизистон ўртасида автомобиль йўллари орқали кириш-чиқишга қўйилган чекловлар 1 сентябрдан бекор қилингани ҳақида хабар берилганди.
Эслатиб ўтамиз, Ўзбекистонда 5 сентябрдан театр, кинотеатр, аттракционли боғлар фаолиятига ва жума намозлари ўқилишига рухсат берилади, йўналишли таксилар фаолиятини қайта тиклайди, болалар боғчалари очилишига рухсат берилади.
Изоҳ (0)