O‘zbekistonda juma namozlarini masjidlarda o‘qishga ruxsat berildi. Bu haqda koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasi qarorida aytiladi.
Qarorga ko‘ra, diniy tashkilotlarda jamoaviy ibodatlarni (juma va shanba, yakshanbalik diniy xizmatlar) amalga oshirishga ruxsat beriladi.
“Kun.uz”ning maxsus komissiya a’zosi, bosh vazir o‘rinbosari Aziz Abduhakimovga tayanib xabar qilishicha, jamoaviy ibodatlarni 2020-yil 4-sentabr juma kunidan boshlab amalga oshirish mumkin bo‘ladi.
Bunda ushbu obyektlar quyidagi sanitariya qoidalariga rioya etishi talab etiladi:
- jamoaviy ibodatni o‘tkazish uchun tashrif buyuruvchilar o‘rtasida ijtimoiy masofani ta’minlash;
- diniy tashkilot xodimlari va tashrif buyuruvchilarning tibbiy niqobda bo‘lishi;
- sanitariya-gigiyena va dezinfeksiya talablariga qat’iy rioya etish, bino xonalarni doimiy ravishda dezinfeksiya qilish, ularga kirish-chiqish joylarini pirometrlar, antiseptik vositalar va dezinfeksion “to‘shak”lar bilan jihozlash;
- har bir diniy ibodatdan keyin bino (xona) va undagi jihozlarning yuza qismini dezinfeksion vositalar bilan tozalash;
- bino va xonalarga, shuningdek, havo aylantirish tizimiga zararsizlantirish anjomlarini (ultrabinafsha lampalar va b.) o‘rnatish.
- tana harorati 37 daraja va undan yuqori bo‘lgan yoki infeksiya alomatlari mavjud bo‘lgan tashrif buyuruvchilarni kiritmaslik;
- diniy tashkilotlarga kirish va chiqish joylarida aholining to‘planishiga qat’iy yo‘l qo‘ymaslik.
Eslatib o‘tamiz, O‘zbekistondagi barcha 2070 ta jome masjidi 2020-yil 17-avgust kuni bomdod namozidan boshlab o‘z faoliyatini qayta boshlagan. Bunda masjidlar haftada har kuni o‘z ish faoliyatini olib borishi, faqat juma namozi epidemiologik vaziyat barqarorlashgunga qadar vaqtincha ado etilmasligi qayd etilgandi.
Izoh (0)