O‘zbekistonda karantin talablarini qisqartirish maqsadida Respublika maxsus komissiyasining qarori bilan 2020-yil 5-sentabrdan maktabgacha ta’lim tashkilotlari va umumta’lim maktablarining faoliyatiga ruxsat beriladi.

Qarorga ko‘ra, ota-onalarning fikrlari va mahalliy deputatlar kengashlari takliflariga muvofiq maktabgacha ta’lim tashkilotlari va umumta’lim maktablarining an’anaviy va masofaviy shakldagi faoliyatiga ruxsat etiladi.

Bunda ushbu obyektlar quyidagi sanitariya talablariga rioya etishi talab etiladi:

  • xodimlar va bolalarning (tarbiyalanuvchilarning) sog‘lig‘i holatini doimiy nazorat qilish (tana haroratini muntazam o‘lchab borish), tana harorati 37 daraja va undan yuqori bo‘lgan yoki infeksiya alomatlari mavjud bo‘lgan xodimlar va bolalarni (tarbiyalanuvchilarni) mashg‘ulotlar chetlatish;
  • xodimlar tibbiy niqobdan foydalanishi va ijtimoiy masofani saqlashi;
  • sanitariya-gigiyena va dezinfeksiya talablariga qat’iy rioya etish, bino xonalarni doimiy ravishda dezinfeksiya qilish, ularga kirish-chiqish joylarini pirometrlar, antiseptik vositalar va dezinfeksion “to‘shak”lar bilan jihozlash;

Shuningdek, 5-sentabrdan O‘zbekistonda teatr, kinoteatr, attraksionli bog‘lar faoliyatiga va juma namozlari o‘qilishiga ruxsat beriladi, yo‘nalishli taksilar faoliyati qayta tiklanadi.