2020/2021-ўқув йили учун олий таълим муассасаларининг бакалавриат таълим йўналишларига кириш тест синовлари очиқ майдонларда ташкил этилаётгани сабабли, абитуриентлар хоҳишига кўра тест синовларига бош кийим (кепка) билан келишлари мумкин. Бу ҳақда Давлат тест маркази ахборот хизмати хабар қилди.
Аввал Давлат тест маркази директори Мажид Каримов олий таълим муассасаларига кириш учун ўтказиладиган имтиҳонлар вақтида абитуриентларга тиббий воситалар, ручка ва ичимлик суви бепул берилиши, шунингдек вазият эътиборга олиниб, уларга бош кийим бериш режалаштирилаётганини маълум қилган. У мазкур буюмларнинг ҳаммаси давлат томонидан бепул берилишини айтган ва бош кийим ҳам текинга берилишини қўшимча қилганди.
ОТМга кириш учун ўтказиладиган имтиҳонлар стадионларда бўлиб ўтади, имтиҳонлар 2 сентябрдан бошланади. Хавфсизликни таъминлашга Ички ишлар вазирлиги, Миллий гвардия, Фавқулодда вазиятлар ва Соғлиқни сақлаш вазирлиги ходимлари, турғун ва қўлда олиб юрувчи металлодетекторлар, транспорт ва алоқа воситалари ҳамда хизмат итлари жалб этилади.
Изоҳ (0)