31 август куни «Фориш» тоғ полигонида «АрМИ—2020» VI халқаро армия ўйинлари «Ҳарбий-тиббий эстафета», Қўқонда эса «Йўл патрули» танловининг сўнгги шартлари якунланди. Бу ҳақда Мудофаа вазирлиги ахборот ва оммавий коммуникациялар департаменти хабар берди.
Ҳарбий-тиббий кўпкураш мусобақаси шартига кўра, иштирокчилар тўсиқлардан ўтиш, ярадорларни жанговар техникадан хавфсиз ҳудудга олиб чиқиш, биринчи тиббий ёрдам кўрсатиш, ярадорларни сувли тўсиқдан олиб ўтиш ва эвакуация қилинадиган техникага жойлашиш каби машқларни бажарди.
Ҳакамлар ҳайъати хулосасига кўра, эркаклар баҳсларида Ўзбекистон жамоаси 2572 балл билан «Жамоавий биринчилик» босқичида тенгсиз топилди. Асосий рақобатчилар – россияликлар 1513 балл тўплаб, финишда иккинчи бўлди. Учинчи ўринда Беларусь жамоаси – 814 балл.
Аёллар орасида ҳам ўзбекистонлик ҳарбийлар 1642 балл тўплаб, биринчи ўринни эгаллади. Россия жамоасида 1452 балл. Беларуслар эса — 554 балл билан кучли учликда.
Навбатдаги шартни ҳам ўз фойдасига ҳал қилган ўзбекистонлик ҳарбий тиббиётчилар 2019 йилда «Фориш» тоғ полигони илк бор мезбонлик қилган «Ҳарбий-тиббий эстафета»нинг «Жамоавий биринчилик» босқичида ўрнатилган 07 дақиқа-ю 35,9 сония (эркаклар) ва 11 дақиқа-ю 35,6 сония (аёллар) вақтлик рекордларни мос равишда янгилади: 6 дақиқа-ю 28,8 сония ва 10 дақиқа-ю 09,2 сония.
Шу билан «Ҳарбий-тиббий эстафета» халқаро мусобақаси ўз якунига етди. Барча шартлар бўйича тўпланган умумий натижага кўра, 12 857 балл билан Ўзбекистон Мудофаа вазирлиги жамоаси чемпионликни қўлга киритди. 2-ўрин 10 110 балл билан Россия ҳарбийларига насиб этган бўлса, Беларуслар 6585 балл билан учинчи ўринни эгаллади.
Кейинги ўринлар қуйидагича тақсимланди – Тожикистон, Вьетнам ва Фаластин.
Шунингдек, Қўқон мезбонлик қилган «Йўл патрули» баҳсида ҳам Ўзбекистон шарафини ҳимоя қилган Мудофаа вазирлиги ҳарбийлари биринчи ўринни қўлга киритди ва бу натижа Ўзбекистон жамоасининг мусобақа тарихидаги энг юқори кўрсаткичи ҳисобланади.
Бир неча кун давом этган беллашувларда Мудофаа вазирлиги ҳарбий автомобиль назорати ходимлари жамоаси биринчи, Россия — иккинчи, Беларусь эса — учинчи ўринни қўлга киритди.
Бунга қадар ўзбекистонлик ҳарбийлар «АрМИ—2020» мусобақаларининг «Содиқ дўст» танловида биринчиликни қўлга киритган эди.
Эслатиб ўтамиз, 2019 йилнинг 3—17 август кунлари 10 та давлат ҳудудида «АрМИ–2019» халқаро армия ўйинлари бўлиб ўтган эди. Жиззахдаги «Фориш» полигони биринчи бор «Ҳарбий-тиббий эстафета» йўналишига мезбонлик қилганди.
Изоҳ (0)