Наманганда 5-синф ўқувчисини уриб, тан жароҳати етказган руҳий касалликлар шифохонасида рўйхатда турувчи 24 ёшли шахсга нисбатан жиноят иши қўзғатилди. Бу ҳақда Наманган вилояти ИИБ матбуот хизмати хабар берди.
Маълум бўлишича, 30 август куни соат 13:30 ларда Наманган тумани «Қирғизқўрғон» маҳалласида яшовчи йигит ҳеч бир сабабсиз туманнинг «Бўстон» маҳалласида ота-онаси қарамоғида яшовчи 5-синф ўқувчисини уриб, унга тан жароҳати етказган.
Суриштирув ишлари давомида болани калтаклаган 24 ёшли йигит 2006 йилдан буён Тўрақўрғон туманига қарашли руҳий касалликлар шифохонасида рўйхатда туриши аниқланган.
Ҳозирда ушбу ҳолат бўйича Наманган туман ИИБ ҳузуридаги тергов бошқармаси томонидан Жиноят кодексининг 105-моддаси (қасддан баданга ўртача ёки оғир шикаст етказиш) 1-қисми билан жиноят иши қўзғатилган.
«Ҳурматли ота-оналар вояга етмаган фарзандингизга эътиборли бўлинг. Уларни уйингиздан узоқ ҳудудларда ёлғиз ҳаракатланишига йўл қўйманг», — дея эслатма берилган хабарда.
Аввалроқ Наманганда 26 яшар йигит ҳомиладор келинойисига 15 марта пичоқ ургани, у руҳий хаста деб топилгани хабар берилган эди.
Изоҳ (0)