Британиянинг Compare the Market ташкилоти тадқиқот ўтказиб, автомобиль салонидаги энг ифлос бешта зона рейтингини тузиб чиқди. Бунинг учун мутахассислар машинанинг турли юзаларидан намуна олиб, уларнинг натижасини офис биносидаги ҳожатхона унитази ўриндиғи билан солиштирди, деб хабар беради Motor.
Тажрибада турли синфга оид 10 та автомобиль иштирок этган — оилавий кроссоверлар ва ишчи пикаплардан тортиб, қимматбаҳо моделларга қадар. Ҳар бир автомобиль салонидаги турли юзалардан намуналар олинган: мультимедиа тизими дисплейи, узатмалар қутиси ричаги, руль остидаги тугмалар, ҳайдовчининг хавфсизлик камари, йўловчи ўриндиғи, салон эшиги тутқишлари, олд ойна, орқани кўриш ойнаси, юкхона ва бензобак қопқоғи.
Олинган намуналардаги бактериялар сони офис ҳожатхонасидаги таҳлил натижалари билан ўзаро таққосланди.
Тадқиқот натижаларига кўра, ҳар куни ҳайдовчи ва йўловчи тегинадиган мультимедиа тизими экранидаги бактериялар унитаз четидаги бактериялардан 371 фоизга кўп чиққан. Иккинчи ўринни бактерияларнинг 331 фоизли кўрсаткичи билан узатмалар қутисининг селектори эгаллаган. Ундан кейинги ўрин, руль остидаги тугмалар, руль чамбараги ва тутқичга насиб этган.
Шунингдек, мутахассислар оилавий автомобиль иш автомобилидан кўра икки баробарга кўпроқ ифлосланган бўлишини аниқлади: янги Lexus кроссоверида аниқланган бактериялар сони чанг босган Ford F-150 пикапиники билан солиштирилган. Compare the Market автомобиль ҳайдовчиларига ўз машиналарини тез-тез тозалаш ва салонни дезинфекция қилиб туришни тавсия этади.
Мавзуга доир: Машинада коронавирус юқтириб олмаслик учун 9 маслаҳат
Изоҳ (0)