Пандемия кўплаб тадқиқот лойиҳалари ва илмий ихтироларни тўхтатиб қўйди. Бироқ барчаси секин-аста ўз жойига қайтмоқда. Хусусан, Япониядаги SkyDrive стартапининг учар қурилмаси ҳам деярли тайёр бўлиб қолди, деб хабар беради «Яндекс.Дзен».
Токиодаги SkyDrive компанияси ўзининг CD-03 номли учар автомобили моделини муваффақиятли синовдан ўтказди. Бу вертикал учиш ва қўниш хусусиятига эга дунёдаги энг кичкина электромобиль ҳисобланади. Ерда у 2 та оддий автомобиль жойини эгаллайди.
Toyta полигонида машина ердан икки метр баландликка кўтарилиб, тўрт дақиқа парвоз қилган. Энг муҳими — унинг ичида ҳайдовчи бўлган. SkyDrive лойиҳаси раҳбари Томохиро Фукудзаванинг сўзларига кўра, дунёдаги 100 дан ортиқ учар автомобиль лойиҳаларининг жуда кам қисми учиш тестларидан муваффақиятли ўтган.
Ҳозирча машина 5-10 дақиқа уча олади, бироқ парвоз вақтини 30 дақиқага қадар ошириш, унинг тижорий жиҳатда муваффақиятга эришишини осонлаштиради. Ихтирочилар 2023 йилга бориб «учар автомобиль»ни реал маҳсулотга айлантириш ва уни оммавий етказиб беришни йўлга қўйишни режалаштирмоқда.
Аввалроқ Airbus учувчисиз бошқариладиган вертолёти ўзининг илк парвозини амалга оширган эди.
Изоҳ (0)