Тошкентдаги «Чорсу» савдо маркази нархи 30 миллиард сўмга арзонлаштирилиб, қайта сотувга қўйилди

«Чорсу» савдо маркази бошланғич нархи ўн фоиз (30,35 миллиард сўм)га пасайтирилган ҳолда 273,15 миллиард сўм нархда E-Ijro Auksion савдо майдончасига қайта қўйилди. Бу ҳақда Давлат активларини бошқариш агентлиги хабар қилди.

Объектни балансда сақловчи «Муниципал активларни бошқариш маркази» ДУК таъсисчилигидаги «Тошкент савдо маркази» МЧЖ бўлиб, объект Тошкент шаҳар Шайхонтоҳур тумани Чорсу майдони 3 а-уй манзилида жойлашган.

Савдо марказининг эгаллаган майдони 3,9 гектарга тенг, шу жумладан қурилиш майдони 40 704 квадрат метрни ташкил қилади. Фаолият тури — савдо дўконларини ижара бериш.

Қайд этилишича, Давлат активларини бошқариш агентлигининг 2020 йил 7 майдаги 115-П-сон буйруғи, Давлат мулкини сотишда тендер савдоларини ўтказиш бўйича давлат комиссиясининг 2020 йил 25 августдаги 01-02/1-1504-сонли йиғилиши баёни, Давлат активларини бошқариш агентлигининг 2020 йил 26 августдаги 181-П-сон буйруғига асосан объект бошланғич нархини ўн фоиз (30,35 миллиард сўм)га пасайтирган ҳолда 273,15 миллиард сўм нархда E-Ijro Auksion электрон савдо майдончасига қайта савдога чиқарилиши белгиланган.