Тошкентда Nexia-3 ҳайдовчиси ЙПХ инспекторларининг тўхташ тўғрисидаги ишорасига амал қилмасдан, пиёдани уриб юбориб, унинг ўлимига сабабчи бўлди. Бу ҳақда ИИВ ЙҲХББ ахборот хизмати хабар берди.
Маълумотларга кўра, 27 август куни соат 23:45 ларда Мирзо Улуғбек тумани Паркент кўчасида жойлашган «Қуролли кучлар академияси» қаршисида 27 ёшли Nexia-3 ҳайдовчиси автомобилни бошқариб кетаётиб, ушбу кўчада хизмат олиб бораётган ЙПХБ Махсус батальон 2-сафарбар гуруҳи инспектори Д.Абдуллаевнинг тўхташ ишорасига амал қилмасдан ҳаракатини давом эттирган.
Шунингдек, қоидабузар ҳайдовчи КҲАЙ—Паркент кўчалари чорраҳасида хизмат олиб бораётган ЙПХБ Махсус батальон инспектори Ш.Туклибаевнинг ҳам тўхташ ишорасига бўйсунмасдан ҳаракатни давом эттириб, юқори тезликда ҳаракатланиб, Паркент кўчаси 69-уй қаршисида тартибга солинмаган пиёдалар йўлакчасидан ўтаётган пиёдани уриб юборган. Шундан сўнг, у ЙТҲ жойидан яшириниб, автомобилни Қибрай тумани «Гулбоғ» МФЙ, Гулбоғ кўчасига ташлаб кетган.
28 август куни эса соат 13:00 ларда ҳайдовчи ўз айбига иқрор бўлиб, ИИБга мурожаат қилган ва ЙТҲ жойига қайтиб келган.
ЙТҲ натижасида пиёда, (шахсига аниқлик киритилмоқда) Европа миллатига мансуб, ёши тахминан 65-70 ларда бўлган эркак киши, олган тан жароҳатлари оқибатида воқеа жойида вафот этган.
Маълум бўлишича, қоидабузар ҳайдовчи бир йил мобайнида 4 маротаба маъмурий жавобгарликка тортилган.
Мазкур ЙТҲ юзасидан Мирзо Улуғбек тумани ИИО ФМБ ҳузуридаги Тергов бўлими томонидан дастлабки тергов ҳаракатлари олиб борилмоқда.
Аввалроқ Тошкентда Spark’да пиёдани уриб юборган 24 ёшли ҳайдовчи воқеа жойидан қочиб кетгани, 59 ёшли эркак эса шифохонада вафот этгани тўғрисида хабар берилганди.
Изоҳ (0)