АҚШнинг Невада штати, Рино шаҳрида яшовчи 25 ёшли шахс мамлакатда коронавирусга қайта чалинган биринчи бемор бўлди, деб хабар бермоқда Reuters Невада олимлари томонидан тайёрланган илмий мақолага таяниб.
18 апрелда исми ошкор этилмаган ушбу фуқарода биринчи марта коронавирус қайд этилган. 27 апрелга келиб унда вирус симптомлари йўқолган. Коронавирусни аниқлаш учун икки марта — 9 ва 25 май кунлари ўказилган тест натижалари унда вирус йўқлигини кўрсатган. Лекин 28 май куни у яна COVID-19’га чалинган ва бу сафар касаллик оғирроқ кечган. Вирус геномини секвенирлаш иккинчи касалланиш биринчисидан фарқ қилишини кўрсатган.
Тадқиқот муаллифларининг фикрича, коронавирус билан қайта касалланиш ҳолати кам учрайди. Невадалик фуқаронинг қайта касалланиши мамлакатда қайд этилган қарийб олти миллион нафар COVID-19 беморлари орасида биринчи ҳолат бўлди.
Бу коронавирусга қайта чалиниш тасдиқланган дунё бўйича тўртинчи ҳолат. Дастлабки ҳолат Гонконг олимлари томонидан қайд этилганди. Яна иккитаси Нидерландия ва Бельгия олимлари аниқлаган.
Изоҳ (0)