Нидерландиядаги Лердам шаҳрида жойлашган хусусий музейдан рассом Франс Хальснинг «Пиво кружкаси билан кулиб турган икки бола» номли асари (2020 йил 26 августда, тунда) ўғирлаб кетилди. Ўғрилар музейга орқа эшикдан кирган. Сигнализация ишлаган, аммо полиция воқеа жойига етиб келган вақтда бинода ҳеч ким бўлмаган. Бу ҳақда Meduza хабар берди.
Франс Хальс — голланд рассомчилигининг «олтин асри» дея улуғланадиган XVII аср даври ижодкорларидан бири бўлган. Хальс таниқли рассомлар Рембрандт ва Ян Вермеернинг замондоши, портретлар устаси эди. У франциялик файласуф Рене Декартнинг машҳур портретларидан бирини чизган. Рассом Винсент Ван Гог Хальснинг асарларида қора рангнинг 27 хил соясини илғаш мумкинлиги ҳақида гапирганди.
«Пиво кружкаси билан кулиб турган икки бола» асари 1626 йилда чизилган. Нидерландиялик арт-детектив, санъат оламидаги «Индиана Жонс» Артур Бранд RTL нашрига берган интервьюсида суратнинг нархи 15 миллион АҚШ долларига баҳоланганини билдирган. Картинани аввал ҳам 1988 ҳамда 2011 йилларда ўғирлашган. Иккала ҳолатда ҳам сурат Якоб ван Рейсдалнинг «Мевалар ғарқ пишган ўрмоннинг кўриниши» асари билан бирга ўғирланган. Биринчи ўғирликдан кейин асар орадан уч йил ўтиб, иккинчи марта йўқолганида эса орадан олти ой ўтгач топилган. Иккала ҳолатда ҳам айбланувчилар топилган ва суд қилинган.
Картина иккинчи марта ўғирлаб кетилганидан кейин Лердамдаги музей хавфсизлик чораларини янада кучайтирган. «Пиво кружкаси билан кулиб турган икки бола» ва бошқа қимматбаҳо суратлар алоҳида залга ўтказилган ва у ерга фақат музей ходимларининг ҳамроҳлигида кириш мумкин эди. Музей коронавирус пандемияси даврида эълон қилинган карантин сабаб ёпиб қўйилганди. Музей расмийлари Хальс асарининг яна бир бора ўғирлаб кетилиши юзасидан изоҳ беришни истамаган. Полиция ҳам жиноятчилар ёки асарнинг қаерда бўлиши мумкинлиги юзасидан асосли тахмин айта олмаган.
Артур Бранд RTL’га берган интервьюсида Хальснинг картинаси мафия етакчисининг буюртмасига кўра ўғирланган бўлиши мумкинлигини тахмин қилди. Бундай одамлар ўғирланган санъат асарларини сотиб олиб, ҳукуматлар билан ўзи ўтирган қамоқ муддатини қисқартиришга уринади. 1990 йилларда голландиялик гиёҳванд моддалар савдогари Кис Хаутман, 2000 йилларда италиялик Рафаэлe Империале келишув тузишга уринган ва муваффақиятсизликка учраган.
Бранднинг фикрича «Пиво кружкаси билан кулиб турган икки бола» иккита сабабга кўра ўғирланган бўлиши мумкин: биринчидан асар анча қиммат туради ва хавфсизлик талабларига тўлиқ жавоб бера олмайдиган кичик музейда сақланади. Яна бир сабаб эса асарнинг аввал ҳам икки марта ўғирлаб кетилгани бўлиши мумкин.
«Жиноятчилар суратнинг қимматбаҳо эканини тушунган ҳолда уни ўғирлаш ҳам у қадар қийин кечмаслигига ишонган», —дейди Бранд.
Нидерландия учун бу йил бошидан унча катта бўлмаган музейдан ўғирлаб кетилган иккинчи тасвирий санъат намунаси. Март ойида Ларен шаҳрида Винсент Ван Гогнинг «Баҳор боғи, Нюнен баҳорининг руҳонийлар боғи» номли асари ўғирлаб кетилганди.
Битта тасвирий санъат асарининг уч марта ўғирлаб кетилиши санъат оламидаги рекорд ҳисобланмайди. Рембрандт томонидан 1632 йилда чизилган «Якоб де Ҳейн III»нинг портрети тўрт марта, Ян ва Хуберт ван Эйк 1432 йилда чизган «Генск қурбонгоҳи» олти марта (айрим манбаларга кўра етти марта) ўғирланган. Суратнинг бир қисми ҳанузгача топилмаган.
Изоҳ (0)