Жон Леннонни ўлдирган қотилнинг муддатидан аввал озод бўлиш учун қилган 11-сўрови ҳам рад этилди
Нью-Йорк штатидаги маҳбусларни шартли равишда муддатидан аввал озод қилиши бўйича комиссия таниқли хонанда, The Beatles аъзоси Жон Ленноннинг қотили Марк Чепменни озод қилиш бўйича билдирилган навбатдаги сўровни рад қилди. Бу ҳақда TMZ хабар берган.
Бу Чепменнинг муддатидан илгари озодликка чиқиш бўйича қилган 11-сўрови эди. У келаси сафар 2022 йилда афв сўраб яна комиссияга мурожаат қилиши мумкин.
Марк Дэвид Чепмен 1980 йилнинг 8 декабрида Нью-Йорк марказидаги «Дакота» номли бино олдида The Beatles етакчисини отиб ўлдирганди. Леннон овоз ёзиш студиясидан уйга қайтаётганда қотил тўппончадан унга қарата беш марта ўқ узган. 25 дақиқадан кейин шифокорлар унинг қон йўқотиш оқибатидаги ўлимини қайд этган. Чепмен воқеа жойидан қочишга уринмаган. Суд уни ақли расо деб топиб, 20 йилдан кейин муддатидан олдин шартли озод этилиш ҳақида арзнома бериш ҳуқуқи билан умрбод қамоққа ҳукм қилган.
Суд ҳукмига кўра, Чепмен 20 йилдан бир умргача озодликда маҳрум қилинган, яъни у камида 20 йил давомида қамоқда бўлади ва кейин муайян шароитлар ҳисобга олинса, яна озодликка чиқиши мумкин. Чепмен 2000 йилдан буён қамоқдан чиқаришларини сўраб ҳар икки йилда комиссияга мурожаат йўллаб келади.
2016 йил августда АҚШнинг Нью-Йорк штати расмийлари Британиянинг The Beatles асосчиларидан бири, гуруҳ етакчиси – Жон Леннонни 1980 йилда отиб ўлдирган Марк Дэвид Чепменга тўққизинчи марта муддатидан аввал қамоқдан чиқиш илтимосини рад этган, 2018 йилда ҳам Дэвид Чемпеннинг арзномасини қондириш яна бир бора рад қилинган.
