Алишер Узоқов: Қайнотанинг келинига тегажоғлиги тасвирланган миллий сериаллар менталитетимизга «тўғри келади», аммо «Севги изтироби» тўғри келмайди (видео)

Актёр ва режиссёр Алишер Узоқов «Дарё» интернет-нашрига эксклюзив интервью берди. Интервьюни журналист Феруз Муҳаммад ташкиллаштирди.

Алишер Узоқов суҳбат давомида «Севги изтироби» сериали уч маротаба эфирдан олиб ташланишига муносабат билдирди.

Аниқ сабабини билмайман, лекин барибир оммага айтилган сабаби бўйича кўрадиган бўлсак, менталитетимизга тўғри келмайди, дейилгани учун олиб ташланди. Душманлар ҳам бор барибир. Унақа сериаллар кўп. Нимага айнан «Кара Севда», яъни «Севги изтироби»? Чунки у халқ орасида жуда оммалашди. Умуман олганда, ҳозир бошқа каналлардан кетаётган турк сериалларини «Севги изтироби» билан таққослаб чиқсангиз, маънавиятимизга таъсири айнан бир хил. Бу гапимга жавоб бераман, лекин «Севги изтироби»нинг ягона айби — тезда оммалашгани ва халқ эътиборига тушгани.

Ўзимизнинг ҳозирги олинаётган сериалларда ҳам менталитетга тўғри келмайдиган жойлари кўп. «Оталар сўзи—ақлнинг кўзи»нинг замонавий бир қисмини кўрдим. У ерда битта қайнота келинига «ташаяпти». Бу маънавиятимизга роса тўғри келади-а? Битта қайсидир ўзимизнинг миллий сериалда йигит билан қиз кокаин чекиб ўтиришибди. Нашамас, кокаин, кўрсатиб ўтиришибди. Бу маънавиятимизга роса тўғри келади-а? Бу сериалларни кўп одам кўрмайди, «Севги изтироби» эса яхши бўлгани учун ҳам уни йўқотишди.

Бизда синдиришга келганда биринчилардан бўлишади, илдам қадамлар билан, катта-катта «лом»лар билан синдириб ташлашади.

Бу сериал тўхтатилганини сабаби менталитетимизга тўғри келмайди, ёшлар онгини заҳарлаяпти, хўп, тушунарли. Бундан келиб чиқадики, санъат одамлар онгини, дунёқарашини ўзгартира оладиган соҳа. Нимага биз бу соҳага фақат негатив пайтлар эътибор беришимиз керак? Нега халқ онгини бузаётганда эътибор беришимиз керак? Онгни бузяпти, санъатнинг кучи катта экан, келинглар, шунга кучлироқ эътибор берайлик-да, халқимиз маънавиятини яхши тарафга ўзгартирайлик, деган мақсад нега бизда йўқ?

Алишер Узоқов, актёр, режиссёр

Маълумот учун, «Севги изтироби» Zo‘r TV хусусий канали орқали илк марта 2017 йил сентябридан бошлаб намойиш этила бошланди. 2018 йил февраль ойида Ўзбекистон бош вазири Абдулла Арипов «Севги изтироби» сериалини танқид қилиши ортидан фильм намойиши тўхтатилган эди. Ўшанда сериалнинг эндигина иккинчи фасли намойиши бошланганди. Zo‘r TV телеканали 2019 йил июль ойида «Севги изтироби» эфирга узатилишини маълум қилди. 30 июль куни соат 20:00 да сериал қолган жойидан эфирга узатилди. 31 июль куни эса эса сериал эфирга узатиладиган вақтда бошқа кўнгилочар кўрсатув намойиш этилди. Бу сафар сериалнинг нима сабабдан эфирдан олиб ташланганига изоҳ берилмади.