Жаҳон соғлиқни сақлаш ташкилоти бош директори Тедрос Гебрейесус коронавирус пандемияси миллионлаб одамларнинг руҳий саломатлигига таъсир кўрсатаётганини маълум қилди. Бу ҳақда у Женеведа ўтказилган брифинг вақтида таъкидлаб ўтган.
Гебрейесуснинг сўзларига кўра, руҳий ҳолатга коронавирус сабаб жорий этилган ижтимоий алоқаларни чекловчи чоралар чуқур таъсир кўрсатмоқда.
«COVID-19 миллионлаб одамларнинг руҳий саломатлигига таъсир кўрсатиб, уларда қўрқув ва ваҳима уйғотмоқда, шунингдек, руҳий саломатликни қўллаб-қувватлаш бўйича хизматлар ишининг бузилишига олиб келди», — дейди Гебрейесус.
ЖССТ раҳбарининг таъкидлашича, коронавирус пандемиясига қадар руҳий саломатлик глобал соғлиқни сақлашнинг унутилган масаласи бўлган. «Бугунги кунда миллиардга яқин инсон руҳий бузилишлар билан яшамоқда, ҳар йили уч миллион одам спиртли ичимликларни истеъмол қилиш оқибатида вафот этяпти ва ҳар 40 сонияда дунё бўйлаб бир киши ўз жонига қасд қилмоқда», — дейди у.
Шу билан бирга, руҳий масалалар бўйича сифатли тиббий хизматдан барча ҳам фойдалана олмайди. Даромади ўртача ёки паст давлатларда руҳий бузилиш ва неврологик касалликларга эга 75 фоиз инсон ҳеч қандай даволаниш муолажаларини олмайди.
Мавзуга доир:
Изоҳ (0)