Ikki marotaba koronavirusga chalingan Ukrainaning Ternopol viloyatida istiqomat qiluvchi fuqaro uchinchi bor COVID-19’ni yuqtirib oldi. Bu haqda viloyat sog‘liqni saqlash boshqarmasining Facebook’dagi sahifasida ma’lum qilindi.

Foto: “Gazeta.ru”

“Uchinchi marotaba kasallikka chalingan bemor bor. Koronavirus infeksiyasi bilan kasallanib, so‘ng sog‘aygan inson qayta kasallanishdan himoyalanmaganini tushunishimiz kerak”, — deydi Ternopol SSB boshlig‘i Vladimir Bogaychuk.

Mart oylarining o‘rtalarida Ukrainada hukumati koronavirus pandemiyasi sabab uch haftalik karantin e’lon qilgandi. Xususan, mamlakatda 200 dan ortiq odam ishtirok etadigan ommaviy tadbirlar bekor qilingandi. Sport tadbirlarini tomoshabinlarsiz, xalqaro tashkilotlar roziligi bilan o‘tkazishga ruxsat berilgan. Shuningdek, uch haftaga ta’lim muassasalari yopilgan.

Iyun o‘rtalariga kelib esa Ukraina hukumati ikkinchi to‘lqin boshlanganini ma’lum qildi. Mamlakat bosh vaziri Denis Shmigal fuqarolarni Sog‘liqni saqlash vazirligi tavsiyalariga rioya qilishga chaqirgan: ijtimoiy masofalanishga rioya qilish, niqob taqish, dezinfeksiyani unutmaslik. Bundan tashqari, hukumat karantin cheklovlarini 31-iyulga qadar uzaytirgan.

30-iyul holatiga ko‘ra, Ukrainada koronavirus bilan kasallanganlar soni 69 078 kishini tashkil etmoqda. Hozirga qadar mamlakatda 38 523 nafar bemor sog‘aygan, 1673 kishi COVID-19 qurboniga aylangan.