Ukraina mamlakatlarning “qizil ro‘yxat”ini yangiladi. O‘zbekiston ro‘yxatdan joy oldi

Ukraina Sog‘liqni saqlash vazirligi koronavirus bilan bog‘liq noqulay vaziyat mavjud bo‘lgan “qizil hudud” hisoblangan mamlakatlar ro‘yxatini kengaytirdi, deya xabar beradi “Korrespondent.net”.

Ta’kidlanishicha, 1-avgust, shanba kunidan boshlab Ukrainada “yashil” va “qizil” hududlardagi mamlakatlarning yangi tasnifi amalda bo‘ladi, bu esa ma’lum bir mamlakatdan qaytib kelgandan so‘ng o‘zini izolyatsiya qilish yoki testdan o‘tish zarurligini belgilaydi. Bundan tashqari, xorijdan qaytib kelganlar uchun yangi qoidalari kuchga kirdi.

“Qizil ro‘yxat”ga Ukraina so‘nggi 14 kun ichida har 100 ming aholiga to‘g‘ri keladigan yangi holatlar soni Ukrainadagi ko‘rsatkichdan oshgan mamlakatlar kiritilgan. Bundan tashqari, oxirgi 14 kun ichida kasallanganlar sonining ko‘payishi 30 foizga oshgan mamlakat ushbu ro‘yxatga kiritilgan.

“Yashil” hudud mamlakatlari qatoriga Ukrainadan tashqari Shvetsiya, Portugaliya, Xorvatiya, Belarus, Buyuk Britaniya, Turkiya, Sloveniya, Misr va Italiya kirgan.

“Qizil” hududga O‘zbekiston, Xitoy, Vengriya, Gruziya, Germaniya, Chexiya, Bolgariya, Albaniya, Chernogoriya, Polsha, Fransiya, Rossiya kiradi.

E’tiborli tomoni, “qizil ro‘yxat”ga koronavirus hali rasman tasdiqlanmagan Turkmaniston ham kiritilgan.