Россия компанияси Наманганда туризм соҳасида сунъий интеллектни жорий этиш билан шуғулланадиган бўлди. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокимлиги ҳузуридаги ахборот-коммуникация технологияларини ривожлантириш маркази, вилоят туризмни ривожлантириш бошқармаси ҳамда Россиянинг iVoice Technology компанияси ўртасида Наманганда туризм соҳасида сунъий интеллектни жорий этиш бўйича дастлабки келишувга эришилди.
Мазкур келишувга асосан, компания марказ томонидан ишлаб чиқилган лойиҳага асосан Наманган вилоятидаги туризм субъектлари, хусусан, меҳмонхона ва дам олиш масканларида овозни таниш технологияларини жорий этади.
Дастлабки босқичда iVoice Technology мутахассислари онлайн тарзда вилоятдаги туризм субъектлари раҳбарлари учун соҳага оид технологиялари ҳамда дастурларини тақдим қилади. Маҳаллий тадбиркорларнинг талаб ва истакларидан келиб чиқиб, вилоят учун махсус кўп тилли технология концепцияси ишлаб чиқилади.
Сунъий интеллект технологияларини жорий этишни мақсад қилган тадбиркорлик субъектларига қисман субсидия ажратиш масаласи ҳам кўриб чиқилади.
Маълумот учун, iVoice Technology билан ҳамкорлик 2019 йил август ойида бошланган бўлиб, Наманганда ўтказилган халқаро тиббиёт форуми доирасида компания билан вилоятдаги тиббиёт муассасаларида умумий қиймати 100 минг АҚШ долларигача бўлган овозни таниш технологияларини бепул жорий этиш бўйича инвестицион келишув имзоланганди.
Изоҳ (0)