Хоразм вилояти Шовот туманида хонадонда қиморхона ташкил қилган ва 20 нафардан зиёд қиморбозни тўплаб ўйин ташкил қилган фуқаро ҳамда унинг шериклари фаолиятига чек қўйилди. Бу ҳақда Хоразм вилояти ИИБ ахборот хизмати хабар қилган.
Хабарда қайд этилишича, Шовот туманининг «Роят» маҳалласида яшовчи фуқаро Ж.Х. ўз уйини худди кинолардаги каби кичик казинога айлантирган. У 2020 йил 26 август куни йирик қимор ўйинини ташкил этиш ва ўтказишни режалаштириб, нафақат туманда яшовчи, балки қўшни Қорақалпоғистондан ҳам бир гуруҳ қиморбозларни меҳмонга таклиф қилган.
Қимор ўйинига берилиб кетган 21 нафар қиморбоз хонадонга кириб келган ички ишлар органлари ходимларини пайқамаган, уларга аҳамият ҳам бермаган. Тезкор тадбир давомида қиморга тикилган 33 миллион сўмдан ортиқ қийматдаги пул ҳамда ўйин қарталари ашёвий далил тариқасида расмийлаштириб олинган.
Ҳолат юзасидан ички ишлар органлари томонидан терговга қадар суриштирув ишлари олиб борилмоқда, дейилади хабарда.
Ноқонуний ташкил қилинган қиморхоналар ҳақида аввал ҳам тез-тез хабарлар бериб борилган. Жумладан, июль бошида Наманган шаҳрида Жиноят қидирув бўлими ва ДХХ тезкор ходимлари ҳамкорлигида ўтказилган тезкор тадбирда йирик қиморхона фаолиятига чек қўйилгани ҳақида, 3 августда эса Бухоро вилоятининг Ғиждувон туманида уйида қиморхона ташкил қилиб, пул эвазига карта ўйини ўтказган фуқарога суд ҳукми ўқилгани, у Жиноят кодексининг 278-моддаси 1-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан айбли деб топилиб, уч йил муддатга озодликни чеклаш билан жазолангани хусусида хабар берилган. Шунингдек, 23 август куни Қорақалпоғистоннинг Чимбой туманида қимор ўйнаётган 14 киши қўлга олингани маълум бўлган.
Изоҳ (0)