Владимир Путин Навальнийнинг заҳарланиши билан боғлиқ вазият холис тафтиш қилиниши тарафдори эканини билдирди

Россия президенти Владимир Путин сиёсатчи Алексей Навальнийнинг заҳарланиши ва оғир аҳволда шифохонага тушиши, кейинчалик Германиядаги клиникада даволаниши билан боғлиқ вазиятнинг холис текширилиши тарафдори эканини таъкидлади. У бу ҳақда Италия бош вазири Жузеппе Конте билан телефон суҳбатида маълум қилган.

Суҳбат давомида Путин Навальнийнинг шифохонага тушиши билан боғлиқ вазиятда шошма-шошарлик ва асосланмаган фикрлар билан хулоса қилмаслик лозимлигини қайд этган.

Кремль ахборот хизматининг хабарида «А.Навальний» жумласи илк бора расмий шахс сифатида ишлатилгани айтилмоқда. Аввал ҳам Навальний фамилияси Россия президенти расмий сайтининг 23 та материалида эслаб ўтилган: Путиннинг гапларидан иқтибос келтирган журналистлар томонидан сиёсатчи кўпинча фамилияси билан ёдга олинган ва унинг исми президент гапирган сўзларда учрамас эди.

Алексей Навальний 20 август куни Томскдан Москвага учаётган самолётда аҳволи ёмонлашганидан буён комада. Унинг яқинлари сиёсатчи заҳарланган, деб тахмин қилмоқда.

Навальний қарийб икки сутка давомида Омксдаги клиникада ётди, шундан сўнг у Берлинга олиб кетилди. Омскдаги клиника шифокорлари икки сутка давомида уни олиб кетишга рухсат беришдан бош тортди ва буни беморнинг аҳволи барқарор эмаслиги билан тушунтирди.

Германия ҳукумати россиялик сиёсатчи Алексей Навальний катта эҳтимол билан заҳарланган, деб ҳисобламоқда. Бу ҳақда мамлакат ҳукуматининг расмий вакили Штеффен Зайберт маълум қилган. Кейинчалик сиёсатчи даволанаётган «Шарите» клинкаси Алексей Навалнийни заҳарлашганини тасдиқлаган.