Россиялик олимлар бир вақтнинг ўзида грипп ва коронавирусдан ҳимоя қиладиган ягона вакцина яратиш устида ишламоқда. Бу ҳақда Россиянинг Алмазов номидаги миллий тиббий тадқиқот маркази директори Евгений Шляхто маълум қилди, деб ёзмоқда «РИА Новости».
Унинг сўзларига кўра, лойиҳа устида олимларнинг бир нечта гуруҳи ишламоқда.
«Бу комбинацияли вакцина бўлади. У грипп ва коронавирус инфекциясига қарши иммунитет ҳосил қиладиган моддаларни ўз ичига олади», — дея маълум қилган марказ раҳбари.
Таъкидланишича, препарат ҳозирча бошланғич босқичда турибди, у ҳали ҳайвонларда синовдан ўтказилиши ва бир қатор клиник синовлардан ўтиши керак. Бироқ аллақачон маълум ижобий натижалар олинган.
Эслатиб ўтамиз, Россиянинг Гамалея институти томонидан яратилган вакцина 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади. Россияда коронавирусга қарши ушбу вакцинани оммавий қўллаш октябрь ойидан бошланади.
Россиянинг фармацевтика компаниялари ва илмий-тадқиқот ташкилотларини бирлаштирган Клиник тадқиқотлар ташкилотлари ассоциацияси Гамалея номидаги Эпидемиология ва микробиология марказида ишлаб чиқилган вакцина етарлича синовдан ўтказилмагани учун уни рўйхатдан ўтказишни кечиктиришга чақирганди. Бунга жавобан Россиянинг Соғлиқни сақлашни назорат қилиш федерал хизмати («Росздравнадзор») ушбу вакцина билан бир неча юзлаб кўнгиллилар эмлангани ва уларда вакцинага нисбатан жиддий ножўя таъсирлар кузатилмаганини маълум қилган. Шунингдек, Россия Соғлиқни сақлаш вазирлигининг штатдан ташқари бош эпидемиологи Николай Брико COVID-19’га қарши вакцинани яратишда аденовирус асосида бир хил технология ишлатилганини, шунинг учун бу ҳолда у қайта кўриб чиқишга, кечиктиришга муҳтож эмаслигини билдирган.
Британиянинг Рединг университети вирусология профессори Иэн Жонснинг билдиришича, учинчи босқич синовларидан ўтмаган коронавирусга қарши вакцинани қабул қилиш натижасида вирус мутацияга учраб, янги штаммни ҳосил қилиши, у эса кейинчалик бошқа барча вакциналарни ҳам четлаб ўтадиган бўлиши эҳтимолдан холи эмас.
Россияда мазкур вакцинани оммавий равишда қўллаш 2020 йил октябрь ойидан бошланади. Эмлаш билан бир вақтда вакцинанинг клиник тадқиқотларининг учинчи фазаси ҳам олиб борилади.
Изоҳ (0)