«Ўзбекистон темир йўллари» АЖнинг «Ўзбекистон» локомотив депоси навбатчиси Ю.Б. Жиззах филиалига ҳайдовчи вазифасига ишга киритиб қўйиш эвазига Ж.О. исмли шахсдан 1000 АҚШ доллари талаб қилиб, шунда 300 долларини олган вақтида ашёвий далил билан ушланган. Бу ҳақда Бош прокуратура ахборот хизмати «Дарё»га маълум қилди.
Гумондор Бош прокуратура ҳузуридаги департамент ва ДХХнинг Жиззах вилоят бошқармаси томонидан ўтказилган тезкор тадбирда қўлга тушган.
Ўтказилган терговга қадар текширувда Ю.Б. жами 23 нафар фуқарони «Ўзбекистон» локомотив депосининг турли лавозимларига ишга жойлаштириб қўйиши эвазига умумий миқдори 18 400 АҚШ долларига тенг маблағни қўлга киритгани аниқланган. У 21 нафар фуқаронинг жами 13 300 АҚШ доллари миқдоридаги пулларини ҳанузгача қайтармаган.
Ҳолат юзасидан Ю.Б.га нисбатан Жиноят кодексининг 168-моддаси 3-қисми «б», «в» бандлари (фирибгарлик) ва 28 (жиноят иштирокчилари), 211-моддаси (пора бериш) билан жиноят иши қўзғатилган. Ҳозирда тергов ҳаракатлари олиб борилмоқда.
Аввал «Меҳр-шафқат ва саломатлик» жамғармаси директори бир неча киши билан 2,8 миллиард сўмни талон-торож қилгани, Жиззах вилояти Зафаробод тумани ҳокимлигида иш юритувчи бўлиб ишлайдиган шахс ер ажратиб бериш учун 12 минг АҚШ доллари миқдорида пора олаётган вақтда қўлга олингани, Хоразмда тадбиркордан 20 минг доллар пора талаб қилган кадастр бўлими бошлиғи фош қилингани ҳақида хабарлар берилган.
Изоҳ (0)