Жаҳон соғлиқни сақлаш ташкилоти Африкада полиомиелит бутунлай бартараф этилганини маълум қилди.
ЖССТнинг Африка ваколатхонаси сайтида маълум қилинишича, полиомиелитга қарши кураш бўйича минтақавий сертификатлаш комиссияси қитъада касалликнинг табиий шакли бутунлай йўқ қилинганини тасдиқлади.
Африкада ёввойи полиовирусга чалиниш бўйича сўнгги ҳолат 2016 йилда Нигерияда қайд этилган. ЖССТ маълумотларига кўра, 1996 йилдан буён полиомиелитни йўқ қилишга қаратилган саъй-ҳаракатлар икки миллионга яқин болани умрбод фалажликдан қутқариб, қарийб 180 минг кишининг ҳаётини сақлаб қолди.
«Африкалик биродар ва сингилларим учун муҳим кун: бизнинг қитъамиз полиомиелитдан холи деб эълон қилинади. Бу илм-фан ва ҳамжиҳатлик ёрдамида вирусларни йўқ қилиш ва одамлар ҳаётини сақлаб қолиш мумкинлигини намоён этувчи соғлиқни сақлаш соҳасидаги энг катта ютуқлардан бири», — деган ЖССТ раҳбари Тедрос Гебрейесус ўзининг Twitter’даги саҳифасида.
Полиовирусни йўқ қилиш бўйича жаҳон ташаббуси билан 1988 йилдан буён у билан касалланиш сони 99 фоизга камайди. Аммо Африка минтақасида полиовирус билан касалланиш эҳтимолининг паст даражаси сақланиб қолмоқда.
Маълумот учун, полиомиелит бу — вирус туфайли келиб чиқадиган ўткир юқумли касаллик. У асаб тизимига таъсир қилади ва бир неча соат ичида умумий фалажликка олиб келиши мумкин. Касаллик, асосан, 3-8 ёшдаги болалар ўртасида кенг тарқалган, баъзан катта ёшдагилар орасида ҳам учрайди.
Мавзуга доир: Ердаги энг хатарли тўққиз вирус
Изоҳ (0)