Ўзбекистондаги академик лицейларга саралаш имтиҳонларини ўтказиш 2020 йилнинг 7 сентябрдан 15 сентябргача бўлган вақт оралиғида режалаштирилган. Бу ҳақда олий ва ўрта махсус таълим вазирининг матбуот котиби Фарҳод Бабашев АОКА залида бўлиб ўтган брифингда маълум қилди.
Айни таклиф Ўзбекистон Республикаси таълим муассасаларига ўқишга қабул қилиш бўйича давлат комиссиясига киритилган. Имтиҳонларининг тартиби, академик лицейлар кесимида ўтказиш муддати бўйича қўшимча маълумот тақдим этилади.
Шунингдек, Бабашев Республика махсус комиссияси қарорига кўра, янги ўқув йили таълим муассасаларида масофавий тарзда бошланиши, академик лицейларда ҳам таълим жараёнлари 2-курс ўқувчилари учун масофавий тарзда бошланишини билдирган.
Аввалроқ 11 августда матбуот котиби лицейларга саралаш имтиҳонлари 2 сентябрдан 20 сентябргача ўтказилиши режалаштирилганини айтган эди.
Эслатиб ўтамиз, Ўзбекистон ОТМларига кириш имтиҳонлари 2 сентябрдан бошлаб икки сменада стадионларда ўтказилади ва 14 кун давом этади. ОТМлардаги таълим эса масофавий шаклда бошланади.
Изоҳ (0)